Asya Weşûkanî
Her kesî banga Rêber Apo bihîst, xwend û temaşe kir. Ev banga pîroz ji hêla tevahî gelê Kurd ve li çar parçeyên Kurdistanê bi dilekî fireh û kelecaneke mezin hate pêşwazîkirin. Li qadan dengê jin, ciwan, zarok, pîr û kalan bi dirûşmên, “Bijî Rêber Apo, jin jiyan azadî, bijî yekîtî, xwişk û biratiya gelan” bilind bû.
Her kes hêvî û baweriya xwe ya bi têkoşîn, berxwedan û keda Rêber Apo tîne ziman û dibêjin, “Em timî bi Rêber Apo re ne.” Ez jî bi mebesta banga Rêber Apo ya dawiya heyva Sibatê û bi rasthatina 8’ê Adarê Roja Jinên Kedkar a Cîhanê, kelecan û coşa xwe tînim ziman û dibêjim, “Wê 8’ê Adarê bi banga Rêber Apo re bibe yekpare, ji jin û gelan re ronahiyê bîne.
Ez vê roja bi wate ya 8’ê Adarê di serî de li mirovê herî kedkar û azadîxwaz li pêşengê mirovahiyê Rêber Apo pîroz dikim û dibêjim, bi hêviya em bi Rêber Apo re 4’ê Nîsanê li ser keleha Amedê pîroz bikin, divê em têkoşîna xwe bilind bikin. Her wiha vê roja pîroz li jinên Kurd, Ereb, Çerkez, Tirk, Fars, Ermen, Suryan û tevahî jinên şoreşger ên cîhanê pîroz dikim.
Dem hatiye em jin û civak li her deverê serê xwe hildin, dawiyê li pergala desthilatdar bînin û civaka demokratîk ava bikin, pêş bixin. Pêwîst e hemû jin zanibin ku Rêber Apo pir ji jinan û têkoşîna wan yeqîn dike. Rêbertiya me ji bo jinan kedeke pir mezin daye. Divê em bibin layiqî keda Rêber Apo. Hewce ye em bersiva keda Rêber Apo û têkoşîna wî ya ji bo jinan û tevahî civakê bidin. Divê em wê têkoşînê bi serketina herî mezin tacîdar bikin.
Rêber Apo proja xwe ya ji bo çareseriya demokratîk daniye holê, di vê mijarê de rol û mîsyon daye her kesî. Ez jî dibêjim, werin em ji dil û can beşdarî têkoşînê bibin, di 8’ê Adarê Roja Jinên Kedkar a Cîhanê de asta berxwedan û têkoşînê bilind bikin. Paradîgmaya demokratîk, ekolojîk û azadîxwaziya jinan pêş bixin. Bi vê wesîlê ez tevahî jinên kedkar û şoreşger ên canê xwe ji bo azadiyê feda kirine bi hurmet û minetdarî bi bîr tînim û bejna xwe li hemberî wan ditewînim, soza bilindkirina têkoşînê ji wan re nû dikim.
