Esma Mistefa/ Qamişlo
Hevseroka Gerînendeya Avê ya Qamişlo Nûşîn Hemê da zanîn ku di encama topbaranên dagirkeriyê li ser Bendava Tişrînê de elektirîk li ser herêmê hatiye qutkirin û ev yek bûye sedema derketina kirîza avê ali Qamişlo.
Di encama êrişên dagirkeriya Tirk yên li ser bendava Tişrînê a ku nêzî 2 mehan dewam dike, elektirîk û av li ser herêmê hatiye qutkirin. Yek ji bajarên ku ji ber nebûna elektirîkê pirsgirêkên avê jiyan dike, bajarê Qamişlo ye. Lê ji bo derbaskirina vê pirsgirêkê aliyên têkildar hewildanên çareseriyê dikin. Girêdayî mijara qutbûna avê li bajarê Qamişlo hevseroka Gerînendeya Avê a Qamişlo Nûşîn Hemo ji rojnameya me re axivî.
Nûşîn bal kişan ser stasyon û bîrên ku avê didin bajêr û wiha got: “Li bajarê Qamişlo bi giştî 3 stasyon hene ew jî li taxa Hileliyê, Ewêce û Ceqceq. Herwiha 13 bîrên avê yên deryayî ku bi hemû alavên wan ji jenetor û kehrebe hatine amedekirin ew jî li taxên Rojhilat, cirnik û li taxa cûdî hatine belavkirin.”
Hedefgitina bendavê jêderên jiyanê qut dike
Nûşîn destnîşan kir ku qutbûna avê ji sedema êrişên dagirkeriyê li ser bendavê ye û wiha anî ziman: “Dagirkeriya
Tirkiyê Nêzî 2 meha ye bendava Tişrînê xistiye hedefa xwe û bi dIjwarî tê topbarankirin. Helbet Bendav xwedî cihekî stratejîk e û di binasaziya herêmê de ji aliyê av û kehrebe de xwedî roleke sereke ye. Bi geşedanên ku di Sûriyê de hatine rûdan de, dagirkeriya Tirkiyê yekser berê xwe da cihên stratejîk yên herêman Bakur û Rojhilatê Sûriyê. Yek ji wan jî pira qereqozaq û Bendava Tişrînê bû. Di aliyekî de şerekî gelek mezin û dijwer tê meşandin di aliyê din de jî berxwedaniyeke dîrokî tê raberekirin. Helbet ewqas êrişên dijwar bandora xwe li ser binasaziya bendavê dike. Derveyî ihtîmala hilweşîna bendavê, ev yek êdî xeteriya qutkirina av û elektirîkê dide avakirin. Ji ber qutbûna elektirîka bendavê û hilweşîna bircekê di xeta voltaja 230 KW de ku bendav bi navendan re girê dide, kêmbûnek bi qasî ji sedî 50 kêm bûye. Dayîna elektirîkê niha ji hêla jeneratorên ve tê kirin, lê kapasîteya van jeneratoran têrê nake ku stasyon bi tevahî kapasîteya xwe bixebite.”
Hewildanên çareseriyê
Nûşîn wiha axaftina xwe bi dawî kir: “Niha em hewildana çareserkirina vê yekê dikin. Lê helbet heyanî çareserkirina vê yekê gelê bajêr wê bê av nemîne. Ev yek jî ji aliyê gerînendeya avê bi riya sahrîcan tê belavkirin. Ava ku tê derxistin jî tê baqijkirin û belavkirin. Helbet gelek zehmetî hatin jiyan kirin yek ji wan jî kêmbûna hêza jenetoran, herwiha zehmetiyên ku di nava gel de derdikevin.”
