Navenda Nûçeyan
5 saziyên rewşenbîrî yên Kurd ragihandin ku ji bo avakirina sîwanekê (yekîtiyekê), dê li bajarê Qamişlo di 7`ê Adarê de komxebatekê li dar bixin.
Hevgirtina Rewşenbîrên Rojavayê Kurdistanê (HRRK), Yekîtiya Rewşenbîrên Kantona Cizîrê, Yekîtiya Nivîskarên Kurd li Sûriyeyê (Y.N.K.S), Yekîtiya Giştî Nivîskar û Rojnamevanên Kurd li Sûriyeyê (YNRKS) û Yekîtiya Nivîskarên Kurdistana Sûriyeyê ji bo ragihandina lidarxistina komxebatekê li bexçeyê Xwendinê yê li bajarê Qamişlo civîneke çapemenî li dar xist.
Di civînê de daxuyanî ji aliyê Serokê HRRK`ê Ehmed Huseynî ve hat dayîn.
Ehmed Huseynî eşkere kir ku rewşenbîr û nivîskarên Kurd ji bo avakirina yekîtiyekê dê di 7` Adarê de komxebatekê li hola Zana ya bajarê Qamişlo birêxistin bike.
Li gorî daxuyaniyê bendên ku wê li ser nîqaş di komxebatê de bên pêşxistin wiha ne:
1- Rola rewşenbîrên Kurd di rêgirtina ber gotarên zikreşiyê de li ser asta Sûriyeyê û bi taybet ji bo Kurdan.
2- Rola yekîtiyên nivîskaran û rewşenbîrên Kurd di avakirina xebateke hevbeş de.
3- Rola rewşenbîrên Kurd di pêşxistina xebatê ji bo avakirina yekrêziya Kurdî de.
Civîna çapemeniyê bi pirsên der barê komxebatê de bi dawî bû.
