Dilovan kêfo/Amûdê
Welatî û firoşkarên bajarê Amûdê diyar kirin ku tevî kêmbûna nirxê dolar, lê hîna jî bazirgan kelûpelan bi nirxekî bilind difroşin. Herwiha endamê Desteya Pêjiyanîyê ya bajarê Amûdê Mehmûd Ismaîl anî ziman ku ew rewşa bazarê dişopînin û got, “Bazirgan û firoşkarên ku li gorî xwe kelûpelan bifroşin ew ê bên cezakirin.”
Aloziya ku li Sûriyê ewqas salan dirêj kir, rewşa jiyanî ya hemû welatiyên Sûriyê zehemt kir. Di heman demê de xizaniyeke mezin li Sûriyê pêk hat. Ev rewş heya niha jî tê jiyankirin. Herwiha piştî têkçûna rejîma Eseed hin ceza li ser Sûriyê hatin sivikirin û nirxê dolarê Emerîkî li hemberî lîreya Sûrî kêm bû. Lê bazirgan kelûpelan hîna jî bi nirxekî bilind difiroşin firoşkaran. Gel jî nerazîbûna xwe li hemberî nirxê bilindbûna kel û pelan nîşan didin û ji aliyê peywendîdar daxwaz dikin ku rê li pêşiya vê yekê bigirin.
Derbarê bilindbûna buhayên kelûpelan yek ji welatiyên bajarê Amûdê yê bi navê Mehmûd Xizlanî, herwiha firoşkarê cil û bergan Welîd Zilfo û endamê Desteya Pêjiyanîyê ya bajarê Amûdê Mehmûd Ismaîl ji rojnameya me re axivîn.
Welatiyê bi nave Mehmûd Xizlanî diyar kir ku rewşa aborî û jiyanî bi hemû awayên xwe zehmete û wiha got: “Li Sûriyê bi taybet li Bakur û Rojhilatê Sûriyê rewşa jiyanî û aborî li ser me zehmete û ev barê me giran dike. Bazirgan jî li gorî berjewendiyên xwe rewşa heyî bikar tînin û êşa gel berbiçav nagirin. Em hêvî dikin ku guhertinek baş li ser jiyana me pêk bê û dawî li buhabûna kel û pelan bê.”
‘Rakirina bacan li ser kel û pelan wê rewşa jiyanî baş bike’
Firoşkar Welîd Zilfo diyar kir ku nirxên kelûpelan ne di destê wan de ye û wiha got: “Buhabûna kel û pelan ne di
destê me deye, ji ber ku her seatê nirxê dolar tê guhertin. Em jî li gorî dolar kil û pelên xwe difroşin. Di heman demê de piraniya kel û pelan ji derveyî Bakur û Rojhilatê Sûriyê ji mer tên û di rê de bac li ser wan tên birîn. Dema ku bac li ser kel û pelan bê rakirin wê nirxên wan kêm bibe, herwiha wê gel jî, ji vê yekê razî bin. Hêviya me jî ew e ku jiyan di hemû aliyên xwe de xweş bibe û gel bi aramî û bê astengiyan jiyan bikin.”
‘Bazirganên ku bi serê xwe kar bikin ew ê bên cezakirin’
Di heman çarçoveyê de endamê Desteya Pêjiyanîyê ya bajarê Amûdê Mehmûd Ismaîl diyar kir ku bazirgan û firoşkarên ku ne li gorî nirxên dolar kar bikin wê werin cezakirin û wiha got: “Em rewşa bazarê bi giştî dişopînin.
Pisgirêka ku kel û pel bi awayekî buha tên firotin, ew e ku rewşa dolar li bazarê ne arame. Herwiha bazirganê ku li cem xwe nirxan bilind û nizim bike, wê bên cezakirin. Ji xwe hêviya me ji gel ê me ew e ku bi me re bibin alîkar. Da ku em bi hev re bazara xwe baş bikin. Lewra dema ku ew bibîn kîjan firoşkar ne li gorî bazarê kar bike, werin gazinên xwe bighînin me, em ê jî li gorî hêviyên wan bin.”
