Dîlan Mulhim\ Qamişlo
Rêvebera Koma Şehîd Elfetiriya ya bajarê Dêrikê Zîlan Sîda diyar kir ku kar û xebatên wan di asteke baş de têne meşandin û got, “Koma me ji bo 8’ê Adarê û Newrozê amadekariyên xwe dike, me di destpêkê de hazirtiya roja 8’ê Adarê kiriye û me pênc stran ji bo wê rojê amede kirine.”
Koma Şehîd Elfetiriya yek ji komên muzîkê ye û girêdayî Hîlala Zêrîn e, koma Şehîd Elfetiriya li bajarê Dêrikê ye. Herwiha ev zêdetirî 2 salane fêrî bikaranîna amûrên muzîkê yên wekî tembûr, gîtar û erbane dibin, li ser deng û awazan gelek kesan perwerde dîtine. Perwerdeya xwe jî bi stranên gelerî, dengbêjî û nûjen jiyanî kirine. Heta niha 40 stranên gelerî û hunermendên Kurd ên weke Eyşe Şan, Aram Dîkran kom kirine û heta niha di şahî û çalakiyan de ji bilî gotin, stranên gelerî, Koma Eleftirya li ser nivîsandina gotinên stranan û awazan jî kar meşandine. Di heman demê de heta niha 2 sitran çêkirine. Strana yekemîn bi navê “Xeml û Xêza Kurdistanê” hatiye çêkirin û behsa bedewiya Kurdistanê dike. Strana duyemîn jî li ser berxwedana gerîlayên azadiya Kurdistanê bi navê “Gurzê Gerîla” hatiye amadekirin.
Zîlan Sîda hem dayîke û hem jî kar û xebatên çandê birêvedibe, ji ber ku hezkirina wê ji karê çand û hunerê re heye, kar û xebatên çandê dide meşandin. Herwiha di derbarê kar û xebatên koma Şehîd Elfetiriya Rêvebera Koma Şehîd Elfetiriya a bajarê Dêrikê Zîlan Sîda ji Rojnameya me re axaivî.
Kar û xebatên koma Şehîd Elfetiriya
Zîlan Sîda anî ziman ku kar û xebatên koma Şehîd Elfetiriya di asteke baş de tên meşandin û wiha got: “ Em bi koma xwe derbasî gelek bajarên Rojava bûne û me gelek stranên xwe pêşkêş kirine. Em tevlî gelek şahî û festîvalan bûne yek ji wan jî festîvala orkêş bû û me gelek stranên xwe têde pêşkêş kirin. Dema ku çalakiyên girêdayî jinê çêdibin em tevlî dibin, herwiha koma me di vê demê de bandoreke mezin li civakê kirye, ji ber ku jin divê demê de hemû bend û qeydên civaka paşverû şikandiye û jin îro li beramberî hezaran mirov bi deng û rengê xwe derdikeve li ser dikê. Em weke jin dixwazin ku em bi xwe, xwe rêvebibin û civaka xwe pêş bixin. Di heman demê de êrişên dewleta Tirk a dagirker li ser gelê me û bi taybet hunermendan nikare coş û hêza me bişkîne û em ê, li ser xeta şehîdan têkoşîn û berxwedaniyê berdewam bikin. Em hêza xwe ji şervanên di çepêrên şer de û şehîdên azadiyê digirin.”
Pirojeyên dema pêş
Rêvebera Koma Şehîd Elfetiriya ya bajarê Dêrikê Zîlan Sîda da zanîn ku hazirtiyên wan ji bo 8 ’ê Adarê û Newrozê hene û wiha bi dawî kir: ” Em weke koma Şehîd Eleftiriya bi coşeke mezin dest bi amedakariyan ji bo 8’ê Adarê û Newrozê kiriye, di destpêkê de em hazirtiya 8’ê Adarê dikin û me pênc stran ji bo wê rojê amadekirine. Herwiha kom ji 8 endaman pêktê û hemû jî bi rengekî aktîf tevlî kar û xebatê dibin. Em weke jin bi xwe li amûran dixin û stranên xwe dibêjin. Di heman demê de em hêza xwe ji şervanên di çeperên şer de digirin û bi hêz û coşa wan emê 8’ê Adarê û Newrozê pîrok bikin. Astengiyên li pêşiya karê me derdikevin ew jî kêmbûna amûrê muzîkê ye, lê em hewldidin ku ev astengî nemînin û armanca me ji vî karî pêşxistina çand û hunerê di nava civakê de ye.”
