Dîlan Mulhim \Qamişlo
Hunermend û stranbêja Kurd Mêrva Heyder diyar kir bi riya mûzîkê mirov dikare hest û ramanên xwe bîne ziman û wiha got: “Ez bi riya stranbêjiyê hestên xwe parve dikim, her wiha starbêjî rihatiyeke mezin dibe canê mirovan”.
Rojavayê Kurdistanê bi hunermendên xwe yên ciwan dewlemend e, bi taybet jin û zarok û yek ji wan zarokan yên Rojavayê Kurdistanê ku bi hunera û nameya xwe belavî her derê dike, Mêrva Heyder e.
Kurtejiyan
Hunermeda kurd Mêrva Heyder di sala 2011an de li gundê Sêwiya yê Efrînê ji dayîk bûye, lê demek dirêj li bajarê Helebê jiyan kiriye. Piştire berê xwe daye Tirkiyê û çar salan li wir maye. Carek din vedigere Efrînê û şeş mehan lê dimîne. Bi êrişên dagirkeriya Tirk û çeteyên wê ser Efrînê de, koçberî Kobanê dibe û 5 salan li wir dijî. Piştire ji bo xwendinê berê xwe da bajarê Reqayê û salekê li wir jî dimîne. Piştî wî jî ber xwe dide Qamişlo û li wir jiyan dike.
Di derbarê huner û jiyana xwe de hunermenda kurd Mêrva Heyder ji Rojnameya me re axivî.
‘Starnbêjî aramiya canê mirov e’
Mêrva Heyder diyar kir ku gelek ji mûzîkê hez dike û wiha got: “Min bi temenekî pir biçûk dest bi dengbêjiyê kir, ji ber ku ez ji malbateke hunerî me. Ez ji bafê xwe fêrî mûzîk û dengbêjiyê bûm, di malbatê de bavê û birayê min li tembûr dixin. Destpêkê min perwerdeya mûzîkê li peymangeha Vejîn li bajarê Kobanê girt. Her wiha min çar salan li peymangehê perwerdeya mûzîkê bir û fêr bûm. Yên herî zêde piştgiriya min dikirin, bav û diya min bûn”.
‘Bi riya mûzîkê mirov hestên xwe parve dike’
Mêrva Heyder da zanîn ku dema ew stranên floklorî dibêje gelekî kêfxweş dibe û wiha bi dawî kir: “Min pirî caran stranên xwe bi komên şahiyên ceja Newrozê re gotine. Stranên di cejnê de ji bon min cihê kêfxweşiyê ne. Di starbêjiya xwe de girîngiyê didim starên flokrola kurdî, her wiha di vê demê de min du kilîp çêkirine û kilîpa destpêkê Çav kilê ye li bajarê Kobanê li navenda Bavê Xido me çêkir. Di heman demê de kilîpa duyemîn bi navê Delalê li bajarê Amûdê li cihê floklorê tevî koma mûzîkê û mamoste Sefqan me çêkir û ez hazirya kilîpeke din jî dikim, her wiha ez bi hêvî me ku vegerim cih û warê xwe li bajarê Efrînê”.
