Lîloz Hisên/Qamişlo
Rêveberiya Xweseriya Demokratîk ji cîhanê tevahî re bûye ninmûne. Rengîniya çandên heyî di herêmê de wêneyeke balkêş û xweşik dide diyar kirin.
Di herêma Bakur û Rojhilatê Sûriyê bi destpêkirina aloziya Sûriyê ve, Rêveberiya Xweseriya Demokratîk li ser bingehê biratiya gelan û jiyana hevbeş hate avakirin, ev sîstem ji bo tevahiya cîhanê re bû nimûne. Bi rûxandina rêjîma Baas ev tecrûbe dikare bibe nimûneyek ji bo giştî Sûriyê, ku di destûra nû de hemû pêkhate, ol û bawerî cihê xwe tê de bigrin, nemaze jinên Sûriyeyî, bêyî dûrxistin an paşguhkirina tu aliyekî.
Derbarê serkeftina tecrûbeya Rêveberiya Xweser û pejirandina wê ji bo giştî Sûriyê, Hevseroka Meclisa Rêveber a Rêveberiya Xweseriya Demokratîk a Herêma Bakur û Rojhilatê Sûriyeyê Evîn Siwêd ji rojnameya me re axivî.
Evîn Siwêd di destpêka axaftina xwe de bal kişand ser hukmê rêjîma Baas ku çawa bi yekrengî dihat meşandin û di encamê de gel gelek êş û azar kişandin û wiha anî ziman:“Di heman demê de rola pêkhateyan dihat dûrxistin û di nava mekenîzmeya rêvebirinê de kes nebû ji bilî yek kesî. Desthilatdariyek ku tu carî li gel guhdar nedikir, tenê ji bo berjewendiyên xwe kar dikir, hem jî tu kesî xwe xwedî nedidît ku kar bikin ji bo Sûriyê.”
‘Sistema Rêveberiya Xweser navê Sûriyê gihand cîhanê’
Evîn Siwêd wiha berdewamî da axaftina xwe û got:“Piştî şoreşa Sûriyê, li herêma Bakur û Rojhilatê Sûriyê Rêveberiya Xweseriya Demokratîk hate raghandin û xwe birêxistin kir û bû cihê baweriyê di nava civakê de. Li hemberî terora DAIŞ`ê bi ser ket û cîhan tevahî ji xeteriyê parast.
Evîn Siwêd diyar kir ku dema mirov behsa demokrasiyê bike, helbet ew e ku her kes karibe di cihê biryarê de nêrînên xwe bîne ziman, bêyî cudahî, paşguhkirin û dûrxistin. Nimûneya Rêveberiya Xweser li Bakur û Rojhilatê Sûriyê li tax, bajar û bajarokan tê pêkanîn, dihêle ku bibe nimûneya herî guncaw ji bo pêşeroja Sûriya nû.
‘Rêveberiya Xweser hemû pêkhateyên Sûriyê hembêz dike’
Evîn Siwêd got:“Rêveberiya Xweser tevahî gelê Sûriyê hembêz dike û têde hemû pêkhate, beşên civakê, ol û bawerî bi hev re jiyan bikin û cihê xwe têde dibînin. Ji ber vê yekê pêwîste di rêveberiya nû de her kes cihê xwe bigre û di çarçoveya netewa demukratîk de cihê xwe di pêşeroja Sûriyê de bigre.
Sûriyê wê ji bona hemû gelê Sûriyê be
Evîn Siwêd destnîşan kir ku tecrûbeya Rêveberiya Xweser bi salaye ku heye û piştî aloziya Sûriyê hatiye avakirin û ezmûneke serkeftiye ji bona tevahî Sûriyê. Evîn Siwêd wiha gotinên xwe qedand:“Şêweyê Rêveberiya Xweseriya Demokratîk îro bûye ninmûne ji cîhanê tevahî re û her kes pesnê wê dide, ew maf û çandên heyî diparêze û bi tabloyeke herî balkêş û xweşk dide diyar kirin.”
