Nehîr pale
Hiqûq xwendin û parastina jinê kirin xeyalê şehîd Kerem El-Şehab bû. Çeteyên DAIŞ’ê qedexekirin ku ew bixwîne lê belê bi rizgarkirina Reqayê re wê di sîstema Rêveberiya Xweser de dest bi têkoşînê kir.
Endama Kordînasyona Kombûna Jin a Zenûbiya Hefîze Mela ji rojnameya me re behsa têkoşîna şehîd Kerem El-Şehab kir û wiha got:`Min ji şehîd Kerem pirsî, tu çima hatiye xebatên me? Ji min re got min gelekî li ser xebatên Kombûna Jin a Zenûbiya bihîst û ji bo ez mafên jinê biparêzim û bighîjim edalet û wekheviyê ez tevlî xebatên Kombûna jin a Zenûbiya bûm`. Hefîze anî ziman ku endama Kordînasyona Kombûna Jin a Zenûbiya ya Reqayê Kerem bi riya birayên xwe yên tevlî QSD`ê bibûn navê Rêveberiya Xweser bihîstibû û Mala Jin gelekî bala wê kişandibû.
Şehîd Kerem destpêkê derbasî Kombûna Jin a Zenûbiya ya Reqayê dibe û ciyê xwe di komîteya perwerdeyê de digre. Hefîze ji bo xebatên wê yên perwerde jî wiha got:` Endamên komîteya perwerdê ji bo bikarbin li komîn, meclis û Akademiyan perwerdê bidin, li gorî pêdiviyên jin û ji bo çareserkirina pirsgirêkên civakî bixwe lêkolînan dikin. Şehîd Kerem jî mijara bandora teknîkê li ser jin û civakê diyar kiribû û lêkolîn dikir. Piştî ku lêkolîn kir brûşûr amade kir û me li ser hemû komîteyên xwe belav kir. Piştre jî ew brûşûr ji jinan re hat xwendin û yek ji mijarên sereke yên perwerdê bû`.
`Çalakî lidarxistin yek ji xebatên me ye` Hefîze Mela gotinên xwe wiha berdewam kir: `Li Herêma Bakur û Rojhilatê Sûriyê têkoşîn û berxwedanî heye, me bi riya çalakiyan dixwest ku hebûna xwe diyar bikin, şehîd Kerem gelekî dibû alîkar, her tim nivîsên xwe amade dikir, tevlî çalakiyan dibû û dixwest nêrînên xwe bîne ziman. Sala 2024`an tevlî xebatên me bû, di komîteya perwerdê de bû, derbasî komîn û meclisan dibû û perwerde dida. Me dewreyeke perwerdê li xeta rojavayê Reqayê birêxistin kir û wê berpirsyartiya dewrê rakir. Herî dawî berî ku şehîd bibe bû endama Kordînasyona Kombûna Jin a Zenûbiya ya Reqayê`.
Berî ku birêbikevin Kerem ji min re got:` Hevala Hevîfîze tu nesaxî, em ê hemû şûna te biçin bendava Tişrînê, ev gotinên dawiyê bûn ku min ji şehîd Kerem bihîstin. Em weke Meclisa Kombûna Jin a Zenûbiya bi şehadeta Kerem serbilindin û em ê têkoşîna wê ya ji bo parastina mafên jin û gihîştina edalet û wekheviyê berdewam bikin`.
