Birûc Resûl/ Qamişlo
Berdevka Hêzên Ewlekariya Hundirîn a Jin li Bakur û Rojhilatê Sûriyê Dîler Temo da zanîn ku divê îradeya jin di Sûriya siberojê de bê parastin û jin cihê xwe di hemû qadan de bigre.
Bi destpêkirina pêvajoya nû ya Sûriyê re gelek guhartin û veguhartinên bingehîn di hemû Sûriyê de hatin jiyan kirin, yek ji wan jî tunekirina îrade û hebûna jina azad di hemû qadên Leşkerî, civakî, siyasî û hwd bû. Hişmendiya nû ya ku Sûriyê pê tê rêvebirin, xwe dispêre heman mebestê ku îradeya jinê di tu qadên jiyanê de zindî nebe.
Di sedsala 21`emîn de jina ku rojane di herêma Bakur û Rojhilatê Sûriyê de kêliyên efsanewî dinivîse, muhra xwe li hemû şoreşên di cîhanê de qewimîne xistiye. Têkildarî van mijaran Berdevka Hêzên Ewlekariya Hundirîn ya jinê li Bakur û Rojhilatê Sûriyê Dîler Temo ji Rojnameya me re axivî.
Parastina destkeftiyên şoreşê
Dîler Temo di destpêkê de bal kişand ser rewşa Sûriyê û berxwedana ku tê kirin û wiha got: “Piştê hilweşîna
Sîstema Baas ya qirker û tundrew di Sûriyê de, di aliyê ewlekariya Sûriyê de valatiyeke mezin hat jiyankirin, ji ber şane û çeteyên weke DAIŞ`ê û yên girêdayî dagirkeriya Tirkiyê xwestin ku careke din xwe zindî bikin û êrişî gelek deverên Bakur û Rojhilatê Sûriyê jî bikin, yek ji wan deverên herî girîng jî Bendava Tişrîn û Pira Qereqozaqê. Ji xwe berxwedana ku niha li wir tê jiyankirin, berxwedaneke ku rojane kêliyên dîrokî têne nivîsandin. Li ser wê esasê niha em di Bakur û Rojhilatê Sûriyê de kêliyên dîrokî jiyan dikin. Hemû hêzên me çi leşkerî dibe çi jî civakî dibe, li kêlek hêzên QSD`ê di bendava Tişrînê de şer dikin û li ber xwe didin. Da ku em tavahî destkeftiyên şoreşê ji hemû pilan û êrişan biparêzin.”
Di pêşeroja Sûriyê de pêwîste jin bi îradeya xwe were naskirin
Dîler da zanîn ku sîstema hatiye ser serweriyê, zihniyeta wan ji ya Baas ne cudatire û wiha domand: “Piştî ketina rêjîma Baas û serwerbûna rêveberiya HTŞ`ê li ser Sûriyê, em dibînin ku terz û rêvebirina wan ji hikumeta Baas ne cudatire, di aliyê zihniyetê de hemû dişibin hev ji ber armanca hemû hêzên desthilatdar di asta yekemîn de tunebûna rol û îradeya jin di hikumet û civakê de ye. Li ser wê esasê me dît ku dîsa hebûna jin di asta leşkerî û dîplomasî de qebûl nakin. Bê guman em bi tundî vê yekê qebûl nakin, armanca me weke Bakur û Rojhilatê Sûriyê avakirina Sûriyeke demokratîk ne navendî ye, tê de mafê her kesî bê parastin û jin bi îradeya xwe ya azad jiyan bike. Ev jî yek ji mîras û destkeftiyên şoreşa me ya Rojavayê Kurdistanê ye. ji lewra em jî weke jinên ku li ser xaka Sûriyê jiyan dikin, em ê bi armanca misogerkirina mafê jinê di hemû aliyên jiyanê de kar û xebatê bikin. Em eşkere û vekirî ji hikumeta nû re jî dibêjin ku divê jin cihê xwe di her cihî de bigire.”
`Em ê li pişta hêzên xwe bin`
Berdevka Hêzên Ewlekariya Hundirîn a jin Dîler Temo di dawiya axaftina xwe de bang li hemû gelê Kurd kir ku tevlî refên xweparastinê bibin û wiha got: “Em di vê pêvajoya girîng de weke hêzên Ewlekariya Hundirîn bang li hemû gel û ciwanên xwe dikin ku tevlî seferberiyê bibin, tevlî refên şer bi QSD, YPG û YPJ`ê re bibin. Ji zarokên 7 salî heya 70 salî em bi yek hêz û îradeyê li pişta hêzên xwe bin. da ku em rê li pêşiya hêzên dagirker yên ku dixwazin destkeftiyên me têkbibin, venekin.”
