Nehîr pale
Dayîka 3`ê şehîdan Bedîa Mihemed Abdulrehman anî ziman ku ji ber wan dagirkerî qebûlnekir ev cara 4`emîne ew têne koçber kirin. Dayîka Bedîa sala 1960 li Efrîn ji dayîkbûye. Ew yek ji milîsên kevnar a Şêx Meqsûd e. Sala 1993`an destbi karê milîstiyê kiriye û heyanî 1999`an xebitî ye. 3`ê lawikên wê şehîd in. Ew jî yek ji jinên destpêkê ye ku tevlî têkoşînê bûye û zemînê xebatên jin dane rûniştandin.
Tenê li dibistanekê 35 zarok ji xwendinê qutbûne
Şêniyên Efrîn ji sala 2011`an ve ji warê xwe koçber dibin û hinek ji wan malbatan ev bûye cara 3`emîne ku ji ber dagirkirinê qebûlnakin wan neçar dikin ku dev ji mal û mulkên xwe berdin. Ji Şêx Meqsûd derbasî Efrîn dibin, piştre sala 2018`an ji Efrîn koçberî Şehba dibin, 2024`an jî ji Şehba derbasî kantona Tebqa û Reqayê bûne.
Di vê koçberiyê de yên herî zêde ziyan dibînin zarok in. Her carekê şêniyên Efrînê koçber dibin zarok dev ji xwendina xwe berdidin û nema dikarin biwînin. Zarokên li Şehba dixwendin êdî nema dixwazin bixwînin, ji ber cî guhertin û ji bo alîkariya malbata xwe bikin dibêjin ew ê dev ji dibistanê berdin.
Pêkhateya Ereb û Kurd bi hevre ne
Li dibistana Omer Ibn Xetab 16 malbat dimîn in, Ereb û Kurd in. Malbatên ji pêkhateya Ereb jî qebûlnakin ku di bin dagirkeriya çeteyên Tirkiyê de bijîn. Yek ji wan malbatan ji gundê Basûtê yê navçeya Şêrawa bajarê Efrînê ye, malbata din jî ji gundê Til-Rifet ê Şehba ye. Pêkhateya Ereb û Kurd zimanê hevdû dizanin û di hemû xebatî de bi hevre dibin alîkar. Têkiliya wan a civakî xurte û dilê hemûyan li ser warê wan Efrîn e.
Xwe birêxistin kirine
Malbatên Efrîn û Şehba yên dibistanê xwe birêxistin kirine, komîn çêkirine, Hevserokên komîna xwe (Hiyam Mihemed û Saleh Beşîr) derxistine û komîteya parastinê birêxistin kirine. Komîteya parastinê jî li gorî pêdiviya rewşa ewlehiyê komînê birêxistin dike. Xebatên xizmetguzarî û paqijiyê hemû bihevre dibin alîkar.
Daxwaza vegera Efrîn dikin
Ji zarokan heyanî ixtiyaran dixwazin rojekê berî ya dîtir vegerin warê xwe Efrînê. Ew dûrî Efrînê xwe hîs dikin ku bê xwedî ne, ji qehra Efrînê re nexweş dikevin û her hêviya wan ku rojekê vegerin Efrîna xwe.
