Hêvî Keleş/Qamişlo
Êrişên dagirkeriya Tirk li ser Bendava Tişrînê zêde bûn, lewma da ku piştgiriya QSD`ê bikin bi sedan gelê herêmê berê xwe dan wir. Di nav wan kesên sivîl ên ku bûn hedefa êrişan de du welatiyên bi navê Edhem û Hêza ku hevjînên hev in, şehîd bûn. Keça apê Edhem jî da zanîn ku ew ê li keça wan a sêwî maye, xwdî derkevin.
Dewleta Tirk hemû hêza xwe bi kar tîne da ku vîn û îradeya gelê kurd têk bibe, ji 8`ê Berfanbara 2024`an ve bi balafirên bê mirov û bi çekên giran êrişî Bendava Tişrînê û pira Qeraqozaqê dike. Ji ber vê yekê bi sedan gelên herêmê berê xwe dan wir da ku piştgiriya QSD`ê bikin. Lê dewleta Tirk a dagirker êrişî sivîlan jî kir, di enacamê de hemwelatiyên Kobanê yên bi navê Edhem Elî û hevjîna wî Hêza Mistefa şehîd bûn.
Girêdayî jiyan û şehadeta Şehîd Edhem Elî û hevjîna wî Hêza, keça apê Edhem, Merdiya Elî ji rojnameya me re axivî.
Jiyan û xebata Edhem
Merdiya Elî di derbarê kurtejiyana kurapê xwe Edhem de wiha destnîşan kir: “Edhem kurê apê min e, ez û Edhem bi hev re mezin bûne, wî xwendina xwe ya seretayî li gundê me Hilinc xwendiye. Di refa 7`an de berê xwe daye Cezayîrê li wê derê xwendina xwe berdewam kir û bû endezyar, ev xeyal û daxwazên bavê wî beriya ku jiyana xwe ji dest bide bû ku kurê wî bibe endezyar. Malbata Edhem ji 5 kesan pêk tê, ew sê xort û du keç in. Edhem ji Cezayîrê vedgere Kobanê û ew û dayîka xwe bi hev re jiyan kirin. Herwiha Edhem kesekî pir durist û fedekar bû û tiştên şaş di jiyana xwe de qebûl nedikir. Edhem dema vegeriya Kobanê kete nav kar de û Hêza naskir her du di ofîsekê de kar dikirin.
Edhem û Hêza berê xwe dan ser bendava berxwedanê
Merdiya Elî derbarê çûyîna Edhem û Hêza ber bi bendava berxwedanê ve wiha got: “Evîneke mezin di navabera Edhem û Hêza de hebû, lewma jî dema ku Edhem emadekariyên xwe kir da ku here Bendava Tişrînê ji bo ku piştgiriya şervanên QSD`ê bikie, hevjîna wî Hêza jî biryar da ku bi hevjînê xwe re here. Di encama topbarana dewleta Tirk li ser Bendava Tişrînê her du jiyana xwe ji dest dan. Dema ku Hêza diçû min jê re got keça te temenê wê biçûk e, ji dev bernede lê Hêza got ku hevalên me li Bendavê bi tenê ne em ê jî biçin alîkariya wan bikin.”
Gotinên wan ên dawî
Keça apê Edhem, Merdiya Elî têkildarî qewêtiyên Edhem û Hêza wiha anî ziman: “Dema ku Edhem û hevjîna xwe berê xwe didan Bendavê moralê wan pir bilind bû. Her du bi vîna xwe û bi dilxweşî çûn. Gotinê wan yên dawî ku beriya herin Bendava Berxwedanê ji me re gotin ‘Li Tala miqate bin.’ Herwiha piştî şehadeta wan jî em tekez dikin ku em ê li gorî gotina wan bin û xwedî li Tala derkevin.”
