Hemza Sêvo/ Qamişlo
Nivîskar Yûnis Bhram da zanîn ku tevî hemû astengiyan lê Şoreşa Rojava di qonaxeke serkeftî de ye. Herwiha bi lêv kir ku pêwîste rewşenbîr, nivîskar û hunermendên kurd bibin piştgir ji QSD’ê re.
Li Bakur û Rojhilatê Sûriyê bi taybet li gundewarên Minbic, Bendava Tişrîn û pira Qereqozaqê ji destpêka ruxandina rêjîma Baas ve berxwedaniyeke bêhempa ji hêla YPJ û QSD’ê ve tê meşandin.
Bi vê berxwdaniyê gelek ji çeteyên dagirkeriyê hatin kuştin. Gelên cîhanê vê berxwedaniyê dişopînin. Tevî ku berxwedaniyek dîrokî tê kirin, lê pêwîstiya tevgera siyasî û hêza leşkerî bi xebata rewşenbîrî, çandî û hunerî heye.
Derbarê vê yekjê de nivîskar Yûns Bhram ji rojnameya me re axivî.
‘Tevî hemû azaran, Şoreşa Rojava di qonaxeke serkeftî de ye’
Yûnis Bhram diyar kir ku tevî hemû zehmetî û azaran Şoreşa Rojava di qonaxeke serkeftî de
derbas dibe û wiha got: “Piştî ruxandina rêjîma Baas û têkçûna Essed, êdî kesên din hatin şûna wî. Em dizanin kesên li Şamê, di bingeha xwe de çeteyên DAIŞ’ê ne, lê divê em ji bîr nekin jî ku piştgeha wan a serke jî Enqera ye. Herwiha nêzî 12 wezîrên ku di hikumeta demkî de hatine destnîşankirin, tirk in. Di heman demê de kesên ku desthilatdariya Şamê dikin hîna jî di lîstên cîhanî yên terorê de ne. Ji ber vê yekê eger gav bi aliyên Şamê de hatin avêtin, divê em bi zanebûn gavên xwe biavêjin û berî ku ev gav bên avêtin pêwîste em li hêzên navnetewî yên dost vegerin. Tevî hemû êş, dayîna berdêlên şehadetê û azaran, Şoreşa Rojava di qonaxeke serkeftî de ye, serkeftineke ku berî niha pêk nehatiye li Rojava. Niha em xwedî hêzeke leşkerî ya li ser asta navnetewî ne. Rojava tevî êrişên hawirdorê wekî welatekî bi hêz û serbixwe ye û her kes tê de mîna gêrkan xebatê dike. Rojava xwedî petrol, enerjî û gazê ye, lewma jî divê em ji vê hêza xwe piştrast bin û nehêlin ku ev qonaxa pêşketî ji dest here.”
‘Pêwîste em bibin stûn ji syasetmedar û şoreşgeran re’
Nivîskarê kurd Yûnis Bhram da zanîn ku divê rewşenbîr, nivîskar û hunermend piştgiriya siyastmedar hem jî şoreşgeran bikin û wiha axivî: “Dema ku civakek doza serxwebûn û azadiya xwe bike beriya wê an jî di nav şoreşê re amadekariyê xwe dike. Rola rewşenbîr, nivîskar û hunermendan ji bo destekdayîna şoreşê gelekî girîng e. Di gelek qonaxan de rewşenbîr û hunermendên me yên kurd ji bo şoreşê xwedî rol bûn. Lê şoreşa ku ji milê rewşenbîrî û hunerî ve hat kirin ne bi qasî şoreşa leşkerî bû. Di baweriya min de hejmareke mezin ji nivîskar, hunermend û rewşenbîr, dîlên berjewndiyên partiyan in. Yan jî hin partiyan rê nedan ku ew bibin xwedî rol û li gorî pêwîstiya şoreşê tevbigerin. Lê tevî wiha jî gavên baş di warê çandî de hatin avêtin. Nemaze, kilîpên ku ji bo berxwedaniya Kobanê hatin amedekirin, li ser asta cîhanî dengvedanek çêkir û cilên leşkerî yên şervanên me bûn tirêndek li gel ewripiyan. Stranên ku Hunergeha Welat vê dawiyê derxistin, bûn huner û çandeke navnetewî, hem jî gelek televiziyonên cîhanî ew stran weşandin. Lewma em nikarin bibêjin ku rewşenbîr û hunermend ne xwedî rol in, lê di vê qonaxa hestiyar de pêwîste em bibin stûnek ji siyasetmedar û şoreşgerên xwe re.”
