Ayşa Silêman/ Qamişlo
Rêveberiya Radiyoya Dirbêsiyê FM Rîhan Hesen diyar kir ku Radiyoya Dirbêsiyê 1’ê Çile di sala 2016’an ve hatiye damezrandin, radyo xwe li ser felsefeya Rêber Apo dide avakirin. Armanc ji damezrandina radiyoyê derxistina dengê rastiyê, azadiya jin û meşandina Netewa Demokratîk e.
Radiyoya Dirbêsiyê li ser asta Dirbêsiyê û gundewarên wê ye pêla wê 108’e. Hijmara karmendên radiyoyê 12 kesin 6 jin û 6 xortin. Her yek ji wan bernameyek wan ya taybet heye û her yek bi rengekî cuda pêşkêş dike. Radiyoya bernameyên civakî, jin, zarok, siyasî, bîrdozî pêşkêş dike. Di heman demê de guhdide bûyerên lezgîn jî da ku guhdarên wan ji her tiştî re agahdar bin. Radiyo ji seat 6 û nîvê sibehê heya 12’ê êvarî weşana xwe bi rengekî zindî dike. Di derbarê kar û xebatên Radiyoya Dirbêsiyê ji destpêka avabûna wê heya roja îro Rêveberiya Radiyoya Dirbêsiyê FM Rîhan Hesen ji rojnameya me re axivî.
Kar û xebatê Radiyoya Dirbêsiyê
Rîhan Hesen diyar kir ku ji destpêka avabûna Radiyoyê heta roja îro herî zêde weşan bal dikşîne li ser dozên jinan, mijarên Siyasî, civakî, hunerî, zarok, bîrdozî, xizmetguzarî û wiha got: “Radiyoya Dirbêsiyê ne tenê xwe di aliyekî de daye avakirin. Lê berûvajî wê hemû beşan digre nava xwe. Bi taybet di aliyê jinê de herî zêde xwe dide pêş û bernameyên jin di milê bîrdozî de tên pêşkêş kirin. Armanca me ji girtina hemû aliyên jiyanê ew e ku em hertiştî ji guhdaran re pêşkêş bikin. Seatên destpêkirina bernameya radiyoyê ji seat 6 û nîvê sibehê heyanî 12’ê êvarî zindî weşana xwe dike. Bernameya me bi sirûda Ey Reqîb destpê dike. Bernameya Rojbaş ji seat 8 û nîv dest pê dike heya 11’an, ji guhdaran re him quncik nivîsan, him jî mijarên ku rojane diqewimin çi civakî, siyasî û bîrdozî bi guhdaran re parvedike.
Bernameya Analîza Rojê heye têde çi bûyerên ku di rojê de qewimîne ji guhdaran re tê pêşkêş kirin. Bernameya siyasî, bîrdozî jî heye. Herwiha bernameya taybet girêdayî jin û siyasetê jî heye, ev şîrove dike ku rojane çi siyaset li ser jinê tê meşandin û li hemberî wê sekna jinê û têkoşîna wê li hemberî vê yekê. Her wiha bernameya taybet girêdayî jin û bîrdozî û cihê jinê di nava civakê de heye. Bernameya me ya pêşbirkê jî heye, kesên ku tevlî pêşbirkê dibin û bi ser dikevin diyariyê digrin. Bernameya zarokan, zarok têde cihê xwe digrin him staran û him jî çîrokan dibêjin. Di heman demê de bernameyên me yên ciwanan jî heye têde nêrîn, helwest, kar û xebatên ciwanan tê dayîn. Radiyoya Dirbêsiyê bû cihê perwerdeyê ji gelek kesên ku Ji 2016’an heya roja îro ku tevlî xebatê wê bûn. Ev radiyo ji bo wan bû wek dibistanekî, ji ber ku piraniya kesên ku cihê xwe di vir de digirtin niha cihê xwe di gelek kar û xebatên din yên ragihandinê de digirin.”
Astengiyên kar û xebatên ku têne meşandin
Rîhan Hesen da zanîn ku tu astengiyên mezin bi wan re derneketine, ji ber ku ew û gelê dirbêsiyê yek destin û wiha got: “Hertim em ji bo rexne û pirsgirêkên wan re vekirîne loma rehetiyek li cem wan avabûye û hertim bi me re dibin alîkar. Tenê astengiya ku em dibînin ew jî di milê malpêra me de bû, ji ber ku dewleta Tirk hertim dixwest vexumandinê li ser pêla me bike. Ji ber ku bajarê Dirbêsiyê nêzî sînore. Ji sala 2016’an ve heya niha gelek pêlên weşana radyoyên me hatin girtin, ji ber ku dagirkeriya tirk naxwaze dengê rastî û heqîqetê bighêje gel. Raste em radiyoyeke xwecihî ne lê em hemû bûyerên ku li cîhanê diqewimin ji guhdaran re pêşkêş dikin. Di heman demê de di milê guhdarên me de hin astengî derdiketin ew jî ku pêla me dengê wê baş nedigiha wan, lê ev yek nebû pirsgirêk di pêşiya me de ku em dev ji karê xwe berdin. Vexumandina dijmin ji pêla me re tucarî nikarîbû israr û hêviya me qutbike. Radiyoya me netenê pêl e, di heman demê de malpêra me li ser enternêtê jî heye ji bo kesên ku li me guhdar dikin û tevlî bernamyên me dibin.”
Rêveberiya Radiyoya Dirbêsiyê FM Rîhan Hesen di dawiya axaftinên xwe de got: “Hêviya min ew e ku di demên pêş de em radiyoya dengê rastî û heqîqetê bêtir li pêş bixin. Pilansaziyên ku em dixwazin di dema pêş de bikin ew e ku di milê azadiya jin de hîn bêhtir xebatan bidin meşandin da ku jin bighêje azadiya xwe. Her wiha derfetê bidin herkesê ku dixwaze di riya radiyoya me re xwe perwerde bike.”
