Betalkirina hilbijartinan li dijî destûra bingehîn e

Serokkomarê Iraqê Fûad Masûm îdîa kir ku betalkirina beşek ji encamên hilbijartina 12’ê Gulanê li dijî Destûra Bingehîn e.
Di daxuyaniya ofîsa Serokkomariya Iraqê de hate gotin, “Parlamenta Iraqê berî du rojan biryar da ku beşek ji encamên hilbijartinê bên betalkirin û beşek ji encaman jî bi dest bên jimartin. Bi ya me, ev biryar li dijî Destûra Bingehîn e.”
Di daxuyaniyê de hate ragihandin ku Dadgeha Federal a Iraqê divê li ser mijarê daxuyaniyekê bide.
Parlamenta Iraqê di rûniştina 28’ê Gulanê de biryar dabû ku temamiya dengên li derveyî welat hatine dayin û encama dengdana li kampên koçberan ên li Enbar, Selahaddîn, Mûsil û Diyalayê bên betalkirin. Her wiha 10 ji sedî yê encama dengdanê jî bi dest were jimartin.
Komîsyona Hilbijartinê ya Bilind a Serbixwe ya Iraqê bi daxuaniyekê ragihand ku dengên li 954 navendên dengdanê yên li gelemperiya Iraqê û 67 navendên dengdanê yên li derveyî welat, bi giştî dengên li 1.021 navendan hatine betalkirin.
Li gorî encamên dawî yên hilbijartina parlamenta Iraqê ku 12’ê Gulanê hate kirin, koalîsyona Saîrûn a bi serkêşiya Muqteda Sadr 54 wekîl, koalîsyona Fetîh 47 wekîl, koalîsyona Nasir a bi serokatiya Haydar Ebadî jî 42 wekîl bi dest xistin…ANF