Sekretêrê Partiya Roj a Demokratîk a Kurd li Sûriyê Kovan Keno bang li aliyên Kurd kir ku li dijî komployên dagirkeriya Tirkiyê yên li hemberî gelê Kurd Kongreya Netewî ya Kurdistanê li dar bixin.
Dewleta Tirk a dagirker di demê dawî de bi armanca qirkirinê êrîşên xwe yên li dijî Başûr, Bakurê Kurdistanê, zêde kirine, di heman demê de, kiryarên xwe yên hovane yên li Efrînê û guhertina demografiya herêmê didomîne.
Derbarê planên dewleta Tirk a dagirker ên li dijî gelê Kurd û divê gelê Kurd li hember van polîtîkeyan çi bike, Sekretêrê Partiya Roj a Demokratîk a Kurd li Sûriyê Kovan Keno axivî û anî ziman ku dijminên gelê Kurd wekî biratî anî cîrantî li Kurdan nanere, armancên wan ew e ku berjewendiyên xwe di herêmên Kurdan de pêk bînin.
Kovan Keno komployên ku piştî şoreşên Kurdî hatine kirin bi bîr xist û got, “Ji Şoreşa Şêx Seîd û heta komploya 15‘ê Sibatê ya li dijî Rêberê Gelê Kurd Abdullah Ocalan, komplo di dagirkirina Efrînê de û heya destwerdana di Başûrê Kurdistanê didome.”
Kovan Keno anî ziman ku dagirkeriya Tirkiyê ne tenê partiyekî yan jî yek fikirî hedef digire û got, “Armanca dewleta Tirk ew e nasnameya Kurd ji holê rake. Her kurdekî li kuderê be wekî dijminê xwe dibîne.”
Sekretêrê Partiya Roj a Demokratîk a Kurd li Sûriyê Kovan Keno, di dawiya axaftina xwe de bang li partî û rêxisitnên Kurd kir ku nakokiyên xwe deynin aliyekî û Kongreya Netewî ya Kurdistanê li dar bixin û bi yekîtiyê bersiva dagirkeran bidin.”…ANHA
Li hember êrîşan divê em yekîtiyê ava bikin
