Piştî ku dewleta Tirk ya dagirker û çeteyên wê Efrîn dagirkirin bi sedhezaran Efrînî ne çar man ku ji Efrînê derkevin û li herêma Şehbayê bi cih bibin. Her gelek malbat jî di Efrînê de man û nikaribûn derkevin. Dewleta Tirk û çeteyên dest bi qirkirin û guhertina demografya li Efrînê kir. Ji herêmên cuda yên li Sûriyê malbat anîn li Efrînê bi cih kirin. Malbatên ku li Efrînê hatine bi cih kirin diyar kirin ku ew bi darê zorê anîne Efrînê.
Artêşa Tirk û çeteyên wê piştî ku Efrîn dagirkirin bi lez demografya herêmê diguherînin. Her wiha dizî, talan, revandin, kuştin û şewitandinê bê navber li Efrînê didomînin. Heta niha bi hezaran malbatên ji herêmên Sûriyê anîne li Efrînê bi cih kirine. Li gorî daneyên Navenda Çavdêriyê ya Mafên Mirovan yê Sûriyê heta niha herî kêm 35 hezar Ereb li Efrînê hatine bicihkirin.
EM BI DARÊ ZORÊ ANÎN EFRÎNÊ
Li gor nûçeya Ajansa Fransî AFP’ê Kesekî bi navê Umaima al-Şêx ku bixwe Erebekî ji Xutayê ye û vê gavê tevî malbata xwe li Efrînê bi cih bûye gotiye, “kes naxwaze di avahiyekî ku ne yê wî be de bijî, kes naxwaze ku amûrên ne yê wî bin bi kar bîne, em bixwe dixwazin ku li welatê xwe û di mala xwe de bijîn. Lê belê îro em mecbûr kirin ku em di malên hinekan de bijîn.”
Erebê bi navê Mehdi Haymur jî vê gavê li Efrînê dijî û serpêhatiya xwe wiha anî ziman: “Ez ji Xûtayê me, li Xûtayê em ji mal derxistin û anîn vir. Leşkerên Tirk me di malekî Efrînî de bi cih kirin, piştÎ demekê xwediyên malê hatin û em ji wir derketin vê gavê jî avahiyekî xerabe de dimînin. Mehdi Haymur got, “me ji warê me bi zorê dûrxistin anîn xistin malên hinekên din.”
EFRÎNÎ NIKARIN VEGERIN
Osman Xelîl ku welatiyê Efrînê ye, got, “ji Xûtayê gelek malbat hatin vir em bi hev re diaxivin, malbatên ji Xûtayê dikarin werin Efrînê lê malbatên ji Efrînê ne nikarin vegerin malê xwe. Vê gavê di mala xizmên min de kesên biyanî dijîn.”