Li dijî dagirkeriya Tirk rabûn

Kurdistaniyên li Ewropayê dijîn, di çarçoveya “Roja rabûna li ber dagirkeriya Tirk” de êrîşên dewleta Tirk ên li ser Kurdistanê şermezar kirin.
Li bajarê Toulouse yê li Başûrê Fransayê, Kolektîfa Piştgiriya bi Gelê Kurd re, ku ji Navenda Civaka Demokratîk a Kurd, partiyên siyasî, sendîka û rêxistinên civakî yên sivîl pêk tê, bi wesîleya rojê meşek organîze kirin.
Di meşê de dirûşmên “Kujer Erdogan”, “Terorîst Tirkiye” hatin qîrîn û ji bo boykotkirina tûrîzma Tirk belavok hatin belavkirin. Nûnerê KCDK-E jî ji bo gelê Efrînê banga piştgiriyê kir. Di dawiya meşê de mîtîng hate lidarxistin û bi qîrîna dirûşma “Bijî berxwedana Efrînê” qediya.
Li bajarê Florensa yê Îtalyayê, bi beşdariya gelek enternasyonalîstan mîtîngek hate lidarxistin. Nêzî 800 kes tevlî mîtîngê bûn.
Li paytexta Belçîka Brukselê, li Komeleya Çanda Kurdan, Navenda Civaka Demokratîk a Kurd û Komîteya Malbatên Şehîdan li dijî dagirkirina Efrînê civînek li dar xistin. Di civînê de şehîdên meha Gulanê jî hatin bîranîn. Hevserokê KONGRA-GEL Remzî Kartal û nûnerê PYD’ê Koçer Hesekê jî tevlî civînê bûn.
Hevserokê KONGRA-GEL Remzî Kartal bi bîranîna şehîdên têkoşîna azadiyê ya Kurdistanê dest bi axaftina xwe kir û işaret bi berxwedana Rojava û Efrînê kir. Kartal wekî din, hilbijartinên 24’ê Hezîranê yên li Bakurê Kurdistanê û Tirkiyê bi bîr xist û destnîşan kir ku HDP wê dawî li dîktatoriya Erdogan bîne.