Bi hezaran cenazeyê şervanê enternasyonalîst oxirkirin

Cenazeyê şervanê YPG’ê yê Spanyayî Kendal Ramon bi merasîmekê li Dêrikê hate veşartin.
Şervanê YPG’ê yê Spanyayî Ramon Maria Rull Linhof (Kendal Ramon) ku 13’ê Gulanê li gundê Baxoz ê Dêra Zorê şehîd bû, li ser wasiyeta wî li Rojava hate veşartin.
Gelê Dêrikê cenazeyê Kendal Ramon ji nexweşxaneya Şehîd Hogir rakir û bi konvoyek ji wesayitan bir Şehîdgeha Xebat Dêrik.
Cenazeyê Ramon li şehîdgehê bi merasîma leşkerî ya şervanên xweparastinê hate pêşwazîkirin.
Ji Tabûra Enternasyonalîstan a YPG’ê Heqî Nivîskar bi Îngilîzî axivî û qala têkoşîna Şehîd Kendal Ramon a li Rojava û Dêra Zorê kir. Nivîskar diyar kir ku Ramon ji nêrîna Rêberê Gelê Kurd Abdullah Ocalan bawer dikir û got, “Kendal Ramon ji bo rûmet û azadiya gelan û nirxên neteweya demokratîk biparêze ji Spanyayê hat.” Heqî Nivîskar destnîşan kir ku wê li ser şopa şehîdan bimeşin.
Cenazeyê Kendal Ramon li ber tilîlî û dirûşmeyan hate veşartin.