Êdî dema şoreşê ye

Parlementerê HDP’ê Sirri Sureyya Onder di danasîna namzetên Enqereyê de axivî. Onder got, “Êdî dema şoreşê hatiye.”
Rêxistina Enqereyê ya HDP’ê ji bo danasîna namzetên Enqereyê li Navenda Hunerên Hemdem civînek li dar xist. Rêveberên HDP’ê, nûnerên partiyên siyasî, platform, rêxistin û komeleyan tevlî civînê bûn.
EM Ê DI 24’Ê HEZÎRANÊ DE BITEQIN
Hevseroka bajêr a Enqereyê ya HDP’ê Nûr Aytemûr û Xelîl Yildiz di civînê de axivîn. Aytemûr di civînê de got ku, “Di bin şertên faşîzmeke giran de, hilbijartina 24’ê Hezîranê tê lidarxistin. Gelê Kurd, jin û ciwan hatin tasfiyekirin. Êdî dem hatiye ku mirov bibêje êdî bes e. Gelên mazlûm, bindest, kedkar û karker, akademîsyenên aştîxwaz, jin û ciwan êdî hemû dibêjin ‘TAMAM.’ Ew ê hersa gelê Tirkiyê êdî biteqe. Em sozê didin Dayîka Taybet, dayîkên Şemiyê û dayîkên Aştiyê, em sozê didin Ekîn Wan, Alî Îsmaîl û sozê didin hemû kesên ku di teqînên Enqere û Sirûcê de hatine qetilkirin.
DEMA ŞOREŞÊ YE
Parlementerê HDP’ê yê Enqereyê Sirri Sureyya Onder jî got, “Di vê astê de rêhevalên me yên şehîd û girtî jî û rêhevalên me yên ku piştgiriya me dikin, gelekî zêde bûne. Ev jî tê vê wateyê ku dema şoreşê hatiye.
Piştî axaftinan navê namzetên parlementeriyê yên HDP’ê yên Enqereyê yek bi yek hate xwendin.