Ji zêdetirî 7 mehan ve dewleta Tirk a dagirker kiryarên xwe li Efrînê yên wekî kuştin, revandin û qutkirina daran didomîne. Roj bi roj kiryarên xwe yên hovane û nemirovî zêde dike.
Artêşa Tirk a dagirker û çeteyên wê ji destpêka dagirkirina Efrînê ve zêdetirî 2 hezar û 350 sivîl revandine. Çarenûsa 835 sivîlan ne diyar e. Di nava kesên hatine revandin de 139 jin hene. Dagirkeran zêdetirî 4 hezar û 500 darên zeytûnê desteser kirine.
Tê texmînkirin ku ji 7 mehan ve zêdetirî 9 hezar darên zeytûnê li seranserî kantona Efrînê hatine birrîn. Her wiha ji bilî wêrankirina cihên dîrokî, dizîna bermahiyên dîrokî û firotina wan, zêdetirî 5 hezar hektar daristan hatin şewitandin.
Hat ragihandin ku çeteyên artêşa Tirk li çiyayê Qaziqlî yê navçeya Cindirêsê û girê taxa Mehmûdiyê yê bajarê Efrînê bi dehan darên zeytûnê û daristan şewitandine.
Hat diyar kirin ku Goristana Şehîd Seydo ya li gundê Kefersefrê ya Cindirêsê di encama topbarana artêşa Tirk a dagirker de bi temamî hatiye wêrankirin.
Artêşa Tirk û çeteyên wê talankirina hilberîna zeytûnê berdewam dikin. Li gorî rayedarê Desteya Çandiniyê ya Kantona Efrînê da zanîn dagirkeran bi qasî ji sedî 90 ji hilberînê desteser kiriye.
Çeteyên El-Emşat beriya du rojan bi ser malên şêniyan de girt û welatiyê bi navê Semîr Mieratê ji gundê Kaxrê yê navçeya Mabatayê revand.
Ji aliyekî din ve artêşa Tirk bi zanabûn navên dibistan û kolanên kantona Efrînê diguherîne. Her wiha artêşa Tirk wêneyên Erdogan û ala Tirkiyê di têketina navçeya Şiyê de û kolanên sereke û şaxî de daliqandine, ev yek jî bi armanca guhertina demografiya herêmê pêk tînin…ANHA
Kiryarên dagirkeran li Efrînê sînoran nas nakin
