\nDeng\u00ea teq\u00eena gule \u00fb bombeyan li Minbic\u00ea bilind dibe, \u015fervan\u00ean Meclisa Le\u015fker\u00ee ya Minbic\u00ea \u00fb H\u00eaz\u00ean S\u00fbriya Demokrat\u00eek (QSD) \u00ead\u00ee li ber dergeh\u00ean Minbic\u00ea ne. Her kes li bend\u00ea ye ku \u015fer bigih\u00eeje nava baj\u00ear, her wiha her kes li bend\u00ea b\u00fb ku d\u00ea \u015fer\u00ean dijwar li kolan\u00ean baj\u00ear biqewimin, ji ber ku bajar\u00ea Minbic\u00ea xwediy\u00ea cihek\u00ee gir\u00eeng \u00ea le\u015fker\u00ee \u00fb siyas\u00ee ye.
\nBajar\u00ea Minbic\u00ea ji bo \u00e7eteyan navendeke gir\u00eeng a stratej\u00eek b\u00fb ku \u00e7etey\u00ean biyan\u00ee li wir kom dib\u00fbn, \u00e7etey\u00ean ku ji Ewropay\u00ea di ser Tirkiy\u00ea re dihatin S\u00fbriy\u00ea, her wiha y\u00ean ji S\u00fbriy\u00ea \u00fb Iraq\u00ea vediger\u00een Ewropay\u00ea, di Minbic\u00ea re derbas dib\u00fbn. Lewma fermaderek\u00ee le\u015fker\u00ee ku serk\u00ea\u015fiya hemleya Minbic\u00ea dikir, gotib\u00fb Minbic paytexta DAI\u015e`\u00ea ye.
\n\u015eervanan bajar\u00ea Minbic\u00ea dorp\u00ea\u00e7 kirib\u00fb, l\u00ea li derdor\u00ea j\u00ee \u015fer ranewestiya, hin yek\u00eeney\u00ean \u015fervanan h\u00eena j\u00ee gelek gund\u00ean ku di dest\u00ea DAI\u015e`\u00ea de b\u00fbn, rizgar dikirin, yek\u00eeney\u00ean din j\u00ee amadekariy\u00ean xwe dikirin ku bikevin baj\u00ear.
![\"\"](\"https:\/\/ronahi.net\/ku\/wp-content\/uploads\/2018\/08\/minbic-2-300x200.jpg\")
\nK\u00caLIY\u00caN KETINA BAJ\u00caR
\nJi gund\u00ea Hesen Axa ber bi gund\u00ea Kabirc\u00ea y\u00ea n\u00eaz\u00ee navenda (Metahin) li ba\u015f\u00fbr\u00ea baj\u00ear, \u015fervan di van gundan re derbas b\u00fbn. Li gor\u00ee ku fermandar\u00ea tab\u00fbr\u00ean \u015eems El-\u015eimal Eg\u00eed \u015eems El-\u015eimal dib\u00eaje; ber\u00ea wan li navenda Metahin (avahiya a\u015fan) b\u00fb ku n\u00eaz\u00ee tax\u00ean li ba\u015f\u00fbr\u00ea baj\u00ear e.
\nHewldan\u00ean destp\u00eak\u00ea y\u00ean t\u00eaketina baj\u00ear li v\u00ea dever\u00ea dest p\u00ea kirin, avahiya Metahin bilind b\u00fb, avahiya her\u00ee bilind \u00fb mezin b\u00fb li bajar\u00ea Minbic\u00ea, y\u00ean ku bikevin navenda a\u015fan d\u00ea karibin her\u00eameke fireh \u00fb tax\u00ean derdor\u00ea kontrol bikin. Lewma \u015fervanan destp\u00eak\u00ea ber\u00ea xwe da w\u00ea dever\u00ea \u00fb ji wir ber bi baj\u00ear ve bi p\u00ea\u015f de \u00e7\u00fbn.
\nEg\u00eed der bar\u00ea \u015fer\u00ean li navenda a\u015fan de wiha dib\u00eaje: \u201c4 yek\u00eene ketin navenda a\u015fan, dem ber\u00eavark\u00ee b\u00fb, pev\u00e7\u00fbn\u00ean dijwar qewim\u00een ji ber ku \u00e7eteyan gelek xendek \u00fb tunel\u00ean binerd kolab\u00fbn, segvan j\u00ee li ser avahiyan belav kirib\u00fbn, li derdor\u00ea gelek mayin \u00e7andib\u00fbn, b\u00eahtir\u00ee 500 mayinan \u00e7andib\u00fbn, di encam\u00ea de hinek heval\u00ean me \u015feh\u00eed b\u00fbn.\u201d
\nEg\u00eed wiha p\u00ea de \u00e7\u00fb: \u201cRew\u015f aloz b\u00fb, mayin bi tekn\u00eek\u00ean p\u00ea\u015fket\u00ee hatib\u00fbn \u00e7\u00eakirin, em ne\u00e7ar man du rojan rawestin, pa\u015f\u00ea me d\u00eesa \u015fer kir, \u015fer\u00ea di nava avahiya a\u015fan de \u015fer\u00ea xendek \u00fb tunelan b\u00fb, \u00e7eteyan ji tirsa bombebarana balafiran nekar\u00een ji xendekan derkevin.\u201d
\nEg\u00eed dib\u00eaje ku \u015fer\u00ea destp\u00eak\u00ea \u00fb y\u00ea her\u00ee dijwar di p\u00eavajoya rizgarkirina Mibic\u00ea de, \u015fer\u00ea navenda a\u015fan b\u00fb \u00fb wiha dewam dike: \u201cAstengiya her\u00ee mezin xendek\u00ean binerd b\u00fbn, eger me kar\u00eeba wan xendekan bigirin me dikar\u00ee bi h\u00easan\u00ee navend\u00ea rizgar bikin, l\u00ea me cih\u00ea xendekan nedizan\u00ee, ten\u00ea \u00e7ax\u00ea ku \u00e7ete derdiketin \u00fb \u00ear\u00ee\u015f\u00ee me dikirin me cih\u00ea xendek\u00ean wan j\u00ee did\u00eet.\u201d
\n24 \u015fervan tev li \u015fer\u00ea li navenda a\u015fan b\u00fbn, ew 4 kom b\u00fbn, pa\u015f\u00ea 12 \u015fervan\u00ean din j\u00ee tev li wan b\u00fbn \u00fb pev\u00e7\u00fbn\u00ean dijwar r\u00fb dan, \u015fer \u00e7end rojan dewam kir \u00fb bi rizgarkirina navenda a\u015fan bi daw\u00ee b\u00fb.
\nLI NAVEND\u00ca \u015eER DEST P\u00ca DIKE
\nFehed Elabide \u015fervan\u00ea tab\u00fbr\u00ean \u015eems El-\u015eimal e, ew j\u00ee di nava \u015fer\u00ean li avahiya a\u015fan de b\u00fb. Fehed Elabide k\u00ealiy\u00ean destp\u00eak\u00ea y\u00ean v\u00ee \u015fer\u00ee wiha t\u00eene ziman: \u201cYek\u00eeneya me ji 4 \u015fervanan p\u00eak dihat, em bi awayek\u00ee ve\u015fart\u00ee n\u00eaz\u00ee avahiya a\u015fan b\u00fbn heta ku em n\u00eaz\u00ee \u00e7eteyan b\u00fbn, me deng\u00ea axaftin\u00ean wan dibih\u00eest, me destp\u00eak\u00ea bombey\u00ean dest av\u00eatin wan \u00fb pa\u015fde vegeriyan, pa\u015f\u00ea me bi RBG`\u00ea li wan da, me s\u00ea caran hewl da bikevin avahiy\u00ea li me nikar\u00eeb\u00fb.\u201d
\nBi qas\u00ee ku t\u00ea b\u00eera Fehed \u015fer ji saat 19.00`an heta 03.00`yan ber dest\u00ea sib\u00ea dewam dike, \u015fervan dikevin nava avahiy\u00ea l\u00ea \u00e7etey\u00ean DAI\u015e`\u00ea j\u00ee h\u00eena di avahiy\u00ea de ne.
\nFehed wiha p\u00ea de \u00e7\u00fb: \u201cEm \u00e7\u00fbn ser ban\u00ea avahiy\u00ea, l\u00ea \u00e7ete h\u00eena li j\u00ear b\u00fbn, me li j\u00ear din\u00ear\u00ee, me \u00e7ete dit\u00eenin, em heta roja din di dorp\u00ea\u00e7\u00ea de man, n\u00eaz\u00ee n\u00eevro heval\u00ean me hatin \u00fb dorp\u00ea\u00e7 \u015fikand.\u201d
\nPi\u015ft\u00ee \u015fer\u00ea avahiya a\u015fan bi daw\u00ee b\u00fb, Fehed j\u00ee \u00e7\u00fb eniya tax\u00ean rojava y\u00ean Minbic\u00ea \u00fb tev li t\u00eako\u015f\u00eena rizgarkirina rojavay\u00ea baj\u00ear b\u00fb.
\nDI NAVA TAXAN DE \u015eER
\nPi\u015ft\u00ee serkeftina her\u00ee mezin a hemley\u00ea (rizgarkirina avahiya a\u015fan), \u015fervan\u00ean Meclisa Le\u015fker\u00ee ya Minbic\u00ea ber\u00ea \u00e7ek\u00ean xwe da taxa Elki\u015f\u00ee ku n\u00eaz\u00ee avahiya a\u015fan e \u00fb taxa p\u00ea\u015f\u00een a li ba\u015f\u00fbr\u00ea baj\u00ear e.
\nYek\u00eeney\u00ean ku avahiya a\u015fan rizgar kir, ber\u00ea xwe da tax\u00ean baj\u00ear, hin ji wan \u015fervanan di pev\u00e7\u00fbn\u00ean avahiya a\u015fan de \u015feh\u00eed b\u00fbb\u00fbn, y\u00ean may\u00ee j\u00ee \u015fer\u00ea rizgarkirin\u00ea dewam kir.
\n6 yek\u00eeney\u00ean gir\u00eaday\u00ee tab\u00fbr\u00ean \u015eems El-\u015eimal ketin wan taxan \u00fb ji \u00e7etey\u00ean DAI\u015e`\u00ea rizgar kirin, her yek\u00eeneyek ji wan ji 6 \u015fervanan p\u00eak dihat. Jixwe Eg\u00eed j\u00ee fermandar\u00ea \u015eems El-\u015eimal b\u00fb.
\nEg\u00eed der bar\u00ea t\u00eaketina tax\u00ean baj\u00ear de ev ti\u015ft an\u00een ziman: \u201cHin yek\u00eeney\u00ean \u00ear\u00ee\u015f\u00ea heb\u00fbn, hinan j\u00ee parastina kom\u00ean \u00ear\u00ee\u015f\u00ea dikir \u00fb li dever\u00ean rizgarkir\u00ee bi cih dib\u00fbn, carinan em bi qas\u00ee 800 metreyan di nava taxan de di\u00e7\u00fbn, li \u00e7ep \u00fb rast\u00ea me \u00e7ete heb\u00fbn, lewma p\u00eaw\u00eest b\u00fb ku hin yek\u00eeney\u00ean parastina me bikin hebin. Carek\u00ea heval\u00ean me ketin nava taxan, \u00e7eteyan j\u00ee \u00ear\u00ee\u015f\u00ee \u00e7eper\u00ean me y\u00ean eniy\u00ean pa\u015f kir \u00fb s\u00ea \u00e7eper\u00ean me girtin, heval\u00ean me y\u00ean li eniy\u00ean p\u00ea\u015f j\u00ee ketin \u00e7ember\u00ea, ev ti\u015ft li taxa Elki\u015fl\u00ee \u00e7\u00eab\u00fb, heta berbang\u00ea j\u00ee me nedikar\u00ee bilivin ta ku du yek\u00eeney\u00ean me hatin \u00fb heval\u00ean di \u00e7ember\u00ea de rizgar kirin.\u201d
\nDi dema p\u00ea\u015fde\u00e7\u00fbna di nava taxan de \u015fervanan gelek asteng\u00ee ki\u015fandin, me\u015fa di nava kolanan de zor b\u00fb, li haw\u00eerdor segvan hatib\u00fbn bicihkirin \u00fb k\u00ee biliviya gule berdidan\u00ea.
\nEg\u00eed axaftina xwe wiha didom\u00eene: \u201cMe\u015fa di kolanan de ne p\u00eakan b\u00fb, \u015fer\u00ea li Minbic\u00ea ne \u015fer\u00ea kolanan b\u00fb, tu di kolan\u00ea de bime\u015fe tu y\u00ea b\u00ea ku\u015ftin. Me \u00e7awa \u015fer kir, me di d\u00eewaran de kun vekirin, em ji malek\u00ea di\u00e7\u00fbn a din \u00fb wiha p\u00ea\u015fde di\u00e7\u00fbn, eger kolaneke servekir\u00ee j\u00ee heb\u00fbya, p\u00eaw\u00eest b\u00fb bi pa\u00e7ikan bihata nixumandin, ji ber ku \u00e7ete ji xendek\u00ean binerd derdiketin, di\u00e7\u00fbn ser banan \u00fb li \u015fervanan dida.\u201d
\nEg\u00eed dib\u00eaje ku wan di p\u00eavajoya \u015fer\u00ean li taxa Elki\u015fl\u00ee de carinan di malek\u00ea de 4 kun vedikirin \u00fb du k\u00eelometreyan bi v\u00ee away\u00ee p\u00ea\u015fde di\u00e7\u00fbn.
\n\u00c7ETEYAN R\u00caBAZ\u00caN CUDA BIKARDIAN\u00ceN
\nBeriya ku hemleya Minbic\u00ea dest p\u00ea bike, \u015fervan\u00ean QSD`\u00ea di \u015fer\u00ean Koban\u00ea \u00fb Gir\u00ea Sp\u00ee, pa\u015f\u00ea j\u00ee di \u015fer\u00ean bendava Ti\u015fr\u00een\u00ea de derbey\u00ean giran li DAI\u015e`\u00ea dab\u00fbn. H\u00eaza moral\u00ea ya \u00e7eteyan nemab\u00fb, lewma dest av\u00eatin hin r\u00eabaz\u00ean cuda y\u00ean \u015fer.
\nLi Minbic\u00ea \u00e7eteyan r\u00eabaza segvaniy\u00ea bi kar an\u00ee, her wiha gelek mayin \u00e7andin, ev r\u00eabaz j\u00ee n\u00ee\u015fana qelsiya DAI\u015e`\u00ea b\u00fbn.
\nEg\u00eed \u015eems El-\u015eimal di v\u00ea derbar\u00ea de wiha dib\u00eaje: \u201cPev\u00e7\u00fbn\u00ean r\u00fb bi r\u00fb gelek k\u00eam b\u00fbn, \u00e7eteyan r\u00eabaza segvaniy\u00ea bi kar dian\u00ee, gelek heval\u00ean me bi guley\u00ean segvanan an j\u00ee bi mayinan \u015feh\u00eed b\u00fbn, di nava malan de mayin dan\u00eeb\u00fbn, te dest\u00ea xwe biav\u00eata \u00e7i mayinkir\u00ee b\u00fb, gelek mayin li taxa Hezawna hatib\u00fbn dan\u00een.\u201d
\nEg\u00eed dib\u00eaje ku agahiy\u00ean wan der bar\u00ea mayinan de k\u00eam b\u00fbn, wan bi r\u00eabaz\u00ean amator carinan mayin diteqandin, carinan j\u00ee j\u00ea derbas dib\u00fbn \u00fb p\u00ea\u015fde di\u00e7\u00fbn.
\nEg\u00eed wiha p\u00ea de \u00e7\u00fb: \u201cAgahiy\u00ean me der bar\u00ea mayinan de k\u00eam b\u00fbn, lewma gelek heval\u00ean me di encama teq\u00eena mayinan de \u015feh\u00eed b\u00fbn, \u00e7ax\u00ea em diketin hundir\u00ea malan, ji ni\u015fka ve mayinek diteqiya.\u201d<\/p>\n