Welatiyê Efrînê yê bi Mihemed Elî diyar kir ku PKK li ser xeta Şehîdan meşiya, bi têkoşîna ku daye û bi geşedanên ku afirandiye, ne tenê ji bo gelê Kurdistanê, ji bo gelên Rojhilata Navîn û jinên cîhanê bûye hêviya azadiyê.
Zana Roj/ Şehba
Şaristaniya jiyana azad bi fikrên Rêber Abdullah Ocalan, di demezrandina PKK’ê hat temsîl kirin. PKK bi armanca têkbirina koledarî û dagirkeriyê, ji destpêka avabûna xwe ve dest bi têkoşînê kir. Herwiha ji bo bidestxistina mafê gelê Kurd ku bi destê dagirker û dijminên dîrokî yên gelê Kurd hatibûn tunekirin, hat avakirin. Li ser bingeha aşîtî û azadiya gelan xwe rêxistin kir û bi wê mabestê ber bi meşa azadî û têkoşînê ve meşiyan. PKK ji 50 salî ve û heyanî vê rojê, berxwedaneke bêhempa dide meşand û derbên giran li dagirkeran dide. Bi 10’ê salane ku dagirkeriya Tirk û tevayiya hêzên ku destekê didinê, hewil didin ku Tevgera Azadiyê tesfiye bikin, lê nikarin. Bi hezara ji Kurdên welatparêz di nava vê tevgerê de cih girtin û bûn mîrasê fikirê Rêber Ocalan.
Welatiyê Efrînê yê bi navê Mihemed Elî ku Tevgera Azadiyê ji nêz ve nas dike û ji ciwantiya xwe ve û heta vê kêliyê ji bo gelê xwe xebatê dimeşîne, ji me re axivî û diyar kir ku Tevgera Azadiyê bi têkoşîna xwe ya azadiyê wê gelên Rojhilata Navîn ji tarîtiyê derxîne û wan ber bi ronahiya azadiyê ve bibe.
’PKK partiya ku nayê têkbirin’
Mihemed Elî 44’emîn salvegera avabûna PKK li gelê Kurd pîroz kir û wiha got: “Fikrê Rêber Ocalan ji bo avakirina partiyeke bi vî mezinbûyînê pir cuda û kur bû, lewra ev tevger ji xeta azadiyê û têkoşînê derneket, yekemîn tevgerek Kurdî ku bi îdeolojiyek xurt û bi analîzên dem dirêj û li gor demê xwe bi rêxistin kir ji ber wê jî ev partî nehat têkçûn. Li ser xeta Şehîdan meşiya, bi têkoşîna ku daye û bi geşedanên ku afirandiye, ne tenê ji bo gelê Kurdistanê, ji bo gelên Rojhilata Navîn û gelên bindest û jinên cîhanê bûye hêviya azadiyê. ”
’Bi heqîqeta xwe bû hêviya gelan’
Mihemed Elî da xuyakirin ku PKK bi rastiya xwe karî hemû bend derbas bikira û hêviya vejîna jiyana azad da afirandin û wiha domand: “PKK bi rastiya xwe a têkoşîn û berxwedaniyê ku ji bo rizgarkirina xaka Kurdistanê, karîbû bi vê rastiya xwe bi milyonan Kurd û mirovên ji pêkhatiyên din jî bi xwe ve bide girêdan. Di heman demê de di oxira serkeftina vê têkoşînê de bi hezaran ciwanên Kurd û yên azadîxwez bi lêgerîna jiyana azad herikîn nava qadên leşkerî û siyasî, lewra PKK bi hebûn û rastiya xwe ji bo gelê Kurd bû hêviya jiyana azad û tunekarê dagirkeriyê. Tevgera Azadiyê bi têkoşîna xwe ya azadiyê wê gelê Kurd û tevayiya gelên Rojhilata Navîn ji tarîtiyê derxîne û wan ber bi ronahiya azadiyê ve bibe.”
’Şoreşa Rojava mîrasê Tevgera Azadiyê ye’
Mihemed Elî da zanîn ku destkeftiyên ku gelê Kurd di Rojhilata Navîn de bi dest xistine bûye armanca dewleta Tirk a dagirker lewra bi her awayî dixwaze şoreşa Rojava têk bibe û wiha axaftina xwe bi dawî kir: “Serkeftinên ku di herêmên Bakur û Rojhilatê Sûriyê de hatine bidestxistin, mîrasê hêz û fikira Partiya Karkerên Kurdistan e, ji ber vê yekê jî dijminê gelê Kurd dewleta Tirk a dagirker ev bû 10 sal in ji bo têkbirina destkeftiyên vê şoreşê bi hemû hêz û pilanên xwe êrîşê gel û herêmê dike, lê îradeya gerîlayên Kurdistan û berxwedaniya ku ji aliyê gel ve tê raber kirin, ji dijmin re îsbat kiriye ku ev gel bi êrîş û hovîtiya wan nayên tune kirin”.