Darîn Silê/Qamişlo
Badran Çiya Kurd da xuyakirin ku, piştî têkçûna lîstika teqîna Istenbolê, dagîrkeriya Tirkî êrişên xwe zêde kiriye û got, Tirkiyê bêdengiya navneteweyî weke erêkirinekê ji xwe re dibîne, em bang hikûmeta Şamê dikin ku li hember êrişên dagirkeriyê helwestek bi biryar nîşan bide.
Êrişên ku dewleta Tirk ya dagirker li ser herêmên bakur û rojhilatê Sûriyê pêk tîne, ne êrişên nû ne, lê êrişên vê dawiyê bi armanca qirkirina sivîlan û xirabkirina binesaziya herêmê, herwiha belavkirina tirs û tevlîheviyê di nav gelên herêmê de pêk tên. Êrişên dewleta Tirkî ya dagirker ji 19’ê Mijdarê ve, bi awayekî hovane li ser herêmên cûda yên Bakur û Rojhilatê Sûriyê berdewam dikin.
Derbarê rewşa dawî ya bakur û rojhilatê Sûriyê û zêdekirina êrişên dagîrkeriyê hevserokê Desteya Têkiliyên Derve yê Rêveberiya Xweser Badran Çiya Kurd ji me re axivî.
`Armanca Tirkiyê qirkirina gelên Sûriyeyê bi giştî ye`
Badran Çiya Kurda bal kişand ser cihên ku ji aliyê artêşa Tirk ya dagîrker ve tên hedefgirtin û wiha got: “Armanca Tirkiyê qirkirina gelên Sûriyeyê bi giştî ye. Lewra ne kurd tenê li ser vê xakê dijîn. Li kêleka kurdan bi hezaran gelê ereb, ermen, suryan û tirkman hene. Tirkiyê bi riya êrişên xwe yên hovane hewl dide sivîlan tine bike û navendên xizmetê yên li herêmên bakur û rojhilatê Sûriyê xirab bike. Ji bo wê jî di êrişên xwe yên vê dawiyê de gelek cihên ku xizmeta gelê herêmê dikin hedef girt, wek embarên genim, rawestgeha elektrîkê, nexweşxane û dibistanên perwerdeyê. Ev yek zagonên navdewletî binpê dike. Herwiha hêzên garantor jî li hember vê rewşê helwesta xwe diyar nakin. Ev yek nîşan dide ku dibe ku di demên pêş de êriş bi rengekî zêdetir berdewam bikin.”
`Ji bilî zêdekirina êrişan ti rê li pêşiya Erdogan nemaye`
Badran behsa sedema êrişên dawî yên li ser herêmên bakur û rojhilatê Sûriyê kir û wiha pê da çû: “Tirkiye rastî gelek pirsgirêkên navxweyî tê. Dibe ku hevpeymaniya partiyên desthilatdar di hilbijartinan de têk biçe. Ji ber vê yekê Erdogan dest bi lîstikên siyasî û ewlehî kiriye û ji bo ku Hêzên Sûriya Demokratîk reş bike teqîneke mezin li bajarê xwe pêk anî. Lê rastiya vê teqînê diyar bû û idîayên Erdgan vala derketin. Ji bo wê jî ji bilî zêdekirina êrişan ti rê li pêşiya Erdogan nemaye. Lewra berê xwe da êrişeke nû li ser herêmên bakur û rojhilatê Sûriyê. Ev yek jî diyar dike ku ew ber bi dawiya xwe ve diçe û ji tirsa binketina xwe serî li rêbazên xwînrij û hovane dide, da ku xwe ji hilweşînê rizgar bike.”
`Divê hikûmeta Şamê li dijî dagirkeriyê helwesteke bi biryar nîşan bide`
Bedran bal kişand ser hedefgirtin û kuştina leşkerên girêdayî hikûmeta Şamê û axaftina xwe wiha domand: “Ev ne cara yekê ye ku dagîrkeriya Tirkî leşkerên girêdayî hikûmeta Şamê li bakur û rojhilatê Sûriyê û gundewarên Helebê armanc digre. Li dijî vê jî hikûmeta Şamê bêdeng dimîne û ev bêdengî bi bandora Rûsyayê ya li Sûriyê û danûstandinên ewlehî û îstixbaratê yên di navbera Tirkiye û hikûmeta Şamê de girêdayî ye. Herwiha got, Divê hikûmeta Şamê li dijî dagirkeriyê helwesteke bi biryar nîşan bide. Em jî amadene ku li kêleka hikûmeta Şamê parastina xaka Sûriyê bikin. Da ku Tikî vê xaka Sûriyê parçe û dagîr neke.”
`Tirkiye her demê berê xwe dide şer û ji diyalog û aştiyê re ne amade ye`
Bedran diyar kir ku Rêveberiya Xweser hewl dide çareseriyeke aştiyê ji vê rewşê re bibîne û ev yek li axaftina xwe zêde kir: “Em di Rêveberiya Xweser de hertim li ser aşitî û çareserkirina nakokiyan dixebitin. Heriwh em danûstandinan bi hêzên çalak yên di dosyaya Sûriyê de ne dikin û hewl didin ku bi rêyên aştiyê aloziya Sûriyê çareser bikin. Lê Tirkiye her demê berê xwe dide şer û ji diyalog û aştiyê re ne amade ye. Hewl dide senaryoyên dagîrkirina axa Sûriyê dubare bike. Ev yek jî ziyanê digihîne berjewendî, yekîtî û ewlekariya Sûriyê. Herwiha Dagîrkirina hin herêm û bajarên din li Sûriyê tê wateya berdewamkirina dabeşkirina Sûriyê.”
`Pêwîste Rûsya û Emerîka helwesta xwe derbarê êrişan de zelal bikin`
Badran diyar kir ku Balafirên bêmirov yên Tirkiyê yên ku ji roja destpêkê ve derbasî esmanê Sûriyê bûne, tev bi erêkirina hêzên garator in û wiha dirêjî da axaftina xwe: “Ev balafir bêyî agahdarî û erêkirina hêzên çalak derbasî asîmanê Sûriyê nabin. Lewra pêwîste Rûsya û Emerîka helwesta xwe ya derbarê erêkirina pêkanîna êrişan de zelal bikin û li gorî peymanan ku di 2019`an de bi Tirkiyê re îmze kirin tev bigerin. Ji bo wê jî divê Rûsya û Amerîka berpirsiyariya xwe hilgirin û bi cidî kar bikin. Herwiha Tirkiye rawestînin û hesab jî jê bixwazin.”
`Em neçarin li dijî êrişên hovane, bersiveke xurt û bi bandor bidin`
Badran da xuyakirin ku Tirkiye li gorî peymana agirbestê tev nagere û gelek caran hewl da ku binpêkirinên xwe rewa bike û got, Piştî ku tirkiyê destora pêkanîna operasyona bejayî negirt, berê xwe da zêdekirina êrişan bi riya balafiran. Ji bo wê jî em neçarin li dijî êrişên hovane, bersiveke xurt û bi bandor bidin. Lewra mafê me ye ku em parastina xwe û gelê herêma xwe bikin û ev mafekî xwezayî ye.
`Em bi gel û hêza xwe ya leşkerî pir bawer in`
Bedran di berdewamiya axaftina xwe de destnîşan kir ku di vê çarçoveyê de divê hemû pêkhate û gelên Bakur û Rojhilatê Sûriyê helwesta xwe ya bi rihê şerê gelê şoreşgerî nîşan bidin û wiha got: “Divê gel şerê gelê şoreşgerî weke stratejiyeke ku pê hebûna xwe û destkeftiyên xwe biparêze, bibînin. Em bi gel û hêza xwe ya leşkerî pir bawer in. Ji bo wê jî eger rewş astengtir bibe, wê berxwedaneke mezin li hemberî dagîrkeran bê kirin.
Badran destnîşan kir ku êrişên dagîrkeriya Tirkî li ser herêmê destekeke didin terora û wiha domand: “Êrişên hovane yên daîrkeriya Tirkî li ser Kobanê û li ser hêzên me yên ku bi salan li dijî çeteyên DAIŞ’ê şer kirine û ji bo parastina cîhanê ji metirsiya DAIŞê pir li ber xwe dane, wek piştevaniyeke ji bo zindîkirina terorê tê dîtin. Niha bi dehhezaran çeteyên DAIŞ`ê li herêma me girtî ne. Ev çete eger di encama êrişên dagîrkeriyê de ji zindanan werin derxistin, dê bandoreke mezin li cîhanê bi giştî bikin.”
`Parastina gelê herêmê ji dagîrkeriya Tirkî berpirsyariyeke exlaqî`
Hevserokê Desteya Têkiliyên Derve Badran Çiya Kurd di dawiya axaftina xwe de wiha got: “Pêwîste civaka navdewletî û raya giştî ya navneteweyî li hember êrişên Tirkiyê yên ku wê li tevahiya herêmên Rojhilata Navîn bandorê bikin helwesteke zelal û bi biryar nîşan bidin. Parastina gelê herêmê ji dagîrkeriya Tirkî berpirsyariyeke exlaqî ya civaka navneteweyî ye. Em bang Ji hêzên çalak yên di dosyaya Sûriyê û Encûmena Ewlekariyê de dikin ku xebateke cidî û bibandor ji bo rawestandina Tirkiyê bikin û nehêlin herêm bikeve nav aloziyek mezintir.”