Rojbîn Zagros/Qamişlo
Seroka Yekîtiya Jinên Ermenî Anahîd Qesabiyan da zanîn ku armanca êrişên dagirkeriya Tirk qirkirina gelên resen yên herêmê ye û got, Şerê Gelê Şoreşgerî û yekîtiya gelên herêmê riya serkeftinê ye.
Tevayiya pêkhateyên bakur û rojhilatê Sûriyê rastî êrîşên qirkirinê yên dagîrkeriya Tirkî tên. Herwiha di nava binpêkirineke eşkere ji pîvan û yasayên navdewletî û bêdengiya navdewletî ya li hember van kiryaran de, gelek herêm hatine dagîrkirin û heta niha jî gelek jê tên bombarankirin. Ji 19`ê vê mehê ve êriş û balafirên şer yên bêmirov yên dagîrkeriya Tirkî nehatine rawestandin. Tirkiyê di êrişên xwe de sivîl, leşker, jin û zarokan dike hedef. Rojane welatiyê herêmê ji ber êrişên hovane şehîd û birîndar dibin. Dema dawî jî navendên xizmetê û binsaziya herêmê dike hedef.
Derbarê rewşa herêmên bakur û rojhilatê Sûriyê û êrişên dagîrkeriyê, seroka Yekîtiya Jinên Ermenî Anahîd Qesabiyan ji me re axivî û behsa gef û êrîşên dawî yên dewleta Tirk li ser herêmê kir.
Anahîd got, bi nêzîkbûna bidawîhatina Peymana Lozanê, dê Tirkiye jî bi dawî bibe û piştî bidawîkirinê çi bike jî êdî nikare bighêje armanca xwe ya dagirkirina herêmê û tunekirina gelê wê. Ji bo wê jî niha êrişên xwe li ser herêmê zêde kiriye û hewl dide ku temenê xwe dirêj bike û peymana lozanê nû bike.
`Teqîn bi destê îstixbarata Tirkiyê bû`
Anahid bal kişand ser armanca teqîna li Stenbolê û wiha pê da çû: “Teqîn bi destê îstixbarata Tirkiyê bû, lê Tirkiyê hêzên me yên leşkerî idîa dikir, da ku hiceta vê teqînê derfeta êrişkirina herêmên bakur û roojhilatê Sûriyê ji xwe re veke û balafirên xwe bi awayekî zêdetir bide şuxlandin. Herwiha vê dawiyê jî navendên xizmetguzariyê û deverên niştecihbûyî kir hedef, da ku gel bitirsîne û bê çare bihêle.”
`Serkeftin ya me ye, binketin para dagîrkeriyê ye
Anahîd derbarê armancên veşartî yên Tirkiyê di bombebarankirina binesazî û navendên xizmetguzariyê de jî wiha got: “Êrişên Tirkiyê bi baldarî tên kirin, herwiha Tirkiyê cihên taybet dike armanc, da ku jiyan li ser welatiyan qut bike û deriyê koçberiyê veke, herwiha herêmê vala bike. Lê gelê me ji kurd, Ereb, Ermenî, Suryanî û Êzidî armanc û hewldanên dagîrkeriya Tirk li Bakur û Rojhilatê Sûriyê û Rojava nas kirine. Ji bo wê jî li gorî van armancan, em dibînin ku gel haziriya têkoşînê dikin û heta niha li ser ax û milkên xwe mane, ev bi serê xwe destpêka serkeftinê ye. Ji bo wê jî em dibêjin, serkeftin ya me ye, binketin para dagîrkeriyê ye.”
`Bêdengiya civaka navdewletî derfetê dide dagîrkeran`
Anahîd da zanîn ku bêdengiya civaka navdewletî û rêxistinên mafên mirovan ji dagîrkeriyê re çira kesk e û ev yek li axaftina xwe zêde kir: “Ev bêdengî derfet dide dagîrkeran ku xaka bakur û rojhilatê Sûriyê dagîr bike. Em li aştî û diyalogê digerin, QSD ne li dijî diyalogê ye, lê li dijî binppêkirin û tinekirina mafê gela ye. Ji bo wê jî divê hêzên weke Rûsya û Amerîka, yan jî hikometa Şamê diyalogan bi Rêveberiya Xweser re bikin da ku bighêjin çareseriyekê aştiyê.”
`Şerê Gelê Şoreşgerî wê bi ser bikeve`
Anahîd di berdewamiya axaftina xwe de bal kişand ser pêwîstiya amadekarî û yekitiya gelê herêmê li hemberî êrişan û amaje bi wê yekê kir ku Şerê Gelê Şoreşgerî wê bi ser bikeve. Ji bo wê jî divê em ji her êrîşeke dewleta Tirk re amade bin. Serketinên gelê ku rêya azadî û biratiya gelan şopandine, wê dewleta Tirk tengav bike.
`Li dora hêzên xwe bicivin û beşdarî Şerê Gelê Şoreşgerî bibin`
Seroka Yekitiya Jinên Ermenî Anahîd Qesbiyan di dawiya axaftina xwe de bang li gelê herêmê kir ku li dora hêzên xwe bicivin û beşdarî şerê gelê şoreşgerî bibin û azadî û destkeftiyên şoreşê biparêzin. Herwiha got, Ji tevayiya gelê herêmê tê xwestin ku li dora QSD û Rêveberiya Xweser bicivin, mal û milkên gel biparêzin, xwe bi axê ve girêbidin, nerevin û herêmê vala nekin. Em tev QSD’ê ne û emê di nava refên şer de amade bin.