Hiqûqnasan destnîşan kirin ku bêdengiya hêzên navneteweyî cesaretê dide dewleta Tirk a dagirker da ku sûcên xwe dewam bikin. Her wiha bang li hiqûqnasên li cîhanê kirin ku li hemberî sûcên dewleta Tirk helwesteke xurt nîşan bidin
Bêdengiya navneteweyî ya li hember sûcên dagirkeriyê yên dewleta Tirk ên li Bakur û Rojhilatê Sûriyê û êrişên wê yên kîmyewî yên li hemberî gerîlayên azadiyê li Herêmên Parastinê yên Medyayê dewam dike.
Têkildarî mijarê, hiqûqnas Mutez El Sûdan got: “Tevî ku dewleta Tirk a dagirker qanûn
û peymanên navneteweyî bin pê dike, lê hîna rêxistinên navneteweyî nexasim ên hiqûqî bêdeng in. Ev bêdengî dide nîşandan ku we jî şirîkên van êrişan in an jî êrişan bipejirînin. Ji ber vê yekê êdî baweriya bi wan nayê.”
El Sûdan anî ziman ku armanca dewleta Tirk a dagirker ne tenê gerîla ye, lê belê dagirkirina çar parçeyên Kurdistanê ye û wiha dirêjî da axaftina xwe: “Dewleta Tirk a dagirker dizane ku gelê Kurd hêz û îradeya xwe ji gerîla digire, her wiha dizane ku têkçûna wê li hember gerîla tê wateya têkçûna wê li hember gelê Kurd e. Ji ber wê jî hewl dide hêza gel têk bibe. Lê mixabin hin aliyên kurdî hene nexasim Partiya Demokrat a Kurdistanê (PDK) alîkariya dewleta Tirk a dagirker dike da ku armancên wê bi cih bîne û beşdarî êrişên wê yên li ser Herêmên Parastinê yên Medyayê dibe.”
El Sûdan destnîşan kir ku divê hiqûqnasên li tevahî cîhanê helwesteke cidî û zelal li hember êrişên dermirovî yên dagirkeriya Tirk bigirin û li hember wê bisekinin.
Di dawiya axaftina xwe de hiqûqnas Mûtez El Sûdan got: “Em nikarin li hember kiryarên dagirkeriya Tirk bêdeng bin, ji ber wê jî bi navê hiqûqnasên Bakur û Rojhilatê Sûriyê û Dîwana Edaleta Civakî û Dadgeran em banga cezakirina rejîma Tirk dikin. Eger neyê cezakirin dê komkujiyên mezintir li dijî gerîlayên li Herêmên Parastinê yên Medyayê û gelê herêmê pêk bîne.”
Girêdayî heman mijarê, cîgirê hevseroketiya Meclisa Qanûnsaz a Tebqayê hiqûqnas Şadî Îbrahîm îşaret pê kir ku dewleta Tirk hemû qanûn û pîvanên navneteweyî derbas kirin, hemû qanûnên têkildarî rêgezên cîrantiya baş û hurmeta sînor binpê kirin û bi domdarî bi çekên kîmyewî yên qedexekirî êrişî Herêmên Parastinê yên Medyayê dike. Şadî Îbrahîm diyar kir ku ev kiryar li dijî peymanên navneteweyî ne û sûcên şer in.
Îbrahîm bêdengiya hêzên navneteweyî ya li hember kiryarên hovane yên dewleta Tirk şermezar kir û got: “Ev ne cara yekê ye ku dagirkeriya Tirk Hêzên Parastina Gel bi çekên kîmyewî dike hedef. Hêzên navneteweyî bi bêdengiya xwe nîşan didin ku ew êrişên li dijî Herêmên Parastinê yên Medyayê û şêniyên sivîl bi taybetî dipejirînin.”
Îbrahîm anî ziman ku dewleta Tirk bi van êrişan nikare îradeya gerîlayan lawaz bike û
got: “Ev êriş hêz îsrara me ya domandina rêya şehîdan xurtir dike. Em ê tola keç û xortên xwe hilînin.”
Şadî Îbrahîm destnîşan kir ku peymana qedexekirina çekên kîmyewî di sala 1997’an de ket meryetê, lê dewleta Tirk li ber çavê cîhanê çekên kîmyewî bi kar tîne bêyî ku hesab jê were pirsîn.-ANHA