Dilîn EHMED-Qamişlo
Êrişên DAIŞ’ê yên li ser Şingalê fermana 73’an ya li hember civaka Êzîdê bû. Bi hezaran zarok, jin, zilam, kal, pîr hatin kuştin; 5 hezar jin jî hatin revandin û li sûkan hatin firotin. Caziya diyar kir ku, wê hesabê vê fermanê ji sûcdaran bê xwastin.
3’yê Tebaxa 2014’an hêzên hikûmeta başûrê Kurdistanê yên qaşo parastina herêmê dikirin xwe ji Şingalê kişandin û DAIŞ’ê êriş kir. Bi hezaran jin, zarok, mêr kalûpîr bi destê çeteyên DAIŞ`ê hatin kuştin û zêdeyî 5 hezarî jinên Êzîdî hatin revandin. Armanca çeteyan û hêzên wek dewleta tirkî ya dagîrker ku piştgirî didan çeteya ji wê êriş û komkujiyê ew bû ku, civaka Êzîdî tine bikin.
Piştî ku çeteyan êrişî şingalê kir, ji bo parastina gel hêzên gerîla û YPJ/YPG’ê berê xwe dan çol û çiyayayên Şingalê. Şervanan bi têkoşîneke bêhempa bi sedhezaran malbatên Êzîdî, ji komkujî û qirkirinê xilas kirin û gihandin cihên ewle. Rêveberiya Xweser ya bakur û rojhilatê Sûriyê jî, li bajarê Dêrikê ji bo pêşwaziya koçberan, bi navê Newroz kampek ava kir. Piştî rizgarkirina Şingalê ji aliyê şervanan ve gel doza vegerê kir.
`Jinan bi berxwedana xwe armanca dijmin têk bir`
Derheqê mijarê de endama Sîwana Meclisa Jinên Êzîdî Caziya Hewran, bi pêmana salvegerê
komkujiya 2014`an ya ser gelê Şingalê şermezar kir û ji malbatên şehîdan re sersaxî xwest. Caziya herwiha ji bo kesên wenda bi taybetî jinên ji aliyê çeteyan ve hatîn revandin, hêviya rizgariya wan kir. Caziya Hewran axaftina xwe wiha domand: “Heta ruh di canê me de hebe emê êşa civaka xwe ji bîr nekin. Heta mirovek Êzîdî li ser rûyê diyayê hebe, ji ser doza vê civaka ewqas neheqî lê dibe wê venegere. Bi taybetî jin. Divê jinên me tola xwe ji dijmin re nehêlin û heta dawiyê li ber xwe bidin. Çawa niha bi berxwedana xwe armanca dijmin têk dibin, divê bi heman ruhî têkoşîna xwe xurttir bikin.”
`Koka gelê Kurd civaka Êzîdî ye`
Caziya Hewran got, tevî zor û zehmetiyan jî gelê Şingalê ji bo parastina çanda civakê, xwe birêxistin kir. Bi taybetî jina ku bûbû armanca dijmin û wiha berdewamî da gotinên xwe: “Jinên ku dijmin ew ji xwe re kiribûn armanc, bi saya fikir û felsefeya tevgera azadiyê îro di qada leşkerî, siyasî, civakî û çandî de, bûne pêşeng. Ew jinên ku çeteyên DAIŞ`ê dixwestin vîna wan bişkînin, îro bûne pêşengên civakê. Emê bi vê coşê doza mafê xwe li cîhanê bikin. Çawa hêzên navneteweyî tev li me bûn yek û ev komkujî pêk anîn, emê jî heta hetayê li ber deriyê rêxistin û saziyên qaşo mafê mirovan d iparêzin, çalakiyên xwe li dar bixin.
Endama Sîwana Meclisa Jinên Êzîdî Caziya Hewran di dawiya axaftina xwe de wiha got: “Banga min ji gelê Kurd re ew e ku, mafê civaka Êzîdî biparêzin, lewra koka gelê Kurd, civaka Êzîdî ye. Planên ku dijmin li ser civaka Êzîdî dimeşîne, li ser gelê Kurd û tevayiya gelên azadîxwaz e.”
