Navenda nûçeyan-Qamişlo
Ji 23`yê Nîsanê ve li Zap, Avaşîn û Metîna, ji ber êrişên dewleta tirkî ya dagîrker gerîla bi têkoşîneke bêhempa li ber xwe didin. Li ser mijarê Leyal Gulo got, dewleta tirkî, êrişî sivîlan dike û keda wan ya salan talan dike.
Li dijî êrişên dewleta tirkî ya dagîrker yên ser Zap, Avaşîn û Metîna yên ser Herêmên Parastinê yên Medyayê, gelê Kurd li seranserê cîhanê çalakiyan li dar dixe û nerazîbûna xwe nîşan dide. Derheqê mijarê de dayîka du şehîdan Leyla Gulo diyar kir ku, piştî berxwedana gel û bi saya şehîdan, niha li ser xaka xwe bi awayekî azad dijîn. Herwiha da zanin ku ji ber ku siyasete dewleta tirkî li ser dagîrkeriyê hatiye avakirin û li dijî mirovayiyê şer dike, dixwaze gelê Kurd qir bike û destkeftiyên wan dagîr bike.
`Plan qirkirina gel e, ne partî û kesayet in`
Leyla Gulo axaftina xwe wiha domand: “Dewleta tirkî dibêje ez şerê teroristan dikim, lê cîhan giş dibine ku ew bixwe terorîst e û şerê xwediyê xakê dike. Dewleta tirkî ya faşîst li ber çavê cîhanê, bajarên me Efrîn, Serê Kaniyê û Girê Sipî dagîr kirin. Rastiyeke li ber çavan e, Erdogan dixwaze cîhanê bi hişmendiya DAIŞ’ê dagîr bike. Çeteyên mîna DAIŞ`ê bi rêxistin dike û wan dişîne ser xaka me. Armanca dewleta tirkî ne rêxistin û kesayet in, plana wê qirkirina gelê Kurd e.”
Leyla da xuyakirin ku niha gelê Kurd di rojên pir dîrokî re derbas dibe, lê ji ber ku dewleta tirkî dewleteke dagîrker e, Kurd li kû bin êrişî wan dike. Leyla wiha dirêjayî da axaftina xwe: “Ji berê ve Erdogan dibêje `Kurd li ser heyvê bin jî, ezê şerê wan bikim. Ez nahêlim bibin xwedîmaf û xwedîziman.` Bi êrişên ser Zap, Avaşîn û Metîna, ev diyar bû. Ji ber wê divê gelê me hişyar be û baş bizane ku dewleta tirkî bi hiceta PKKê êrişî hebûna wan dike.”
Gelo xweza jî terorist e?
Leyla got, dewleta tirkî bi tang û topên xwe bi çekên qedexekirî, zarokên me şehîd dixe û dar û çiyayên me tevan dişewitîne, gelo xweza jî terorist e? Di zagon û olan de qedexe ye ku mirov xwezaya civakê xirab bike. Çima cîhan tev li hemberî sûcên ku dewleta tirkî derheqê me Kurdan de dike bêdeng maye? Banga me ji dinyayê û rêxistinên mafên mirovan re ew e ku, çav û guhê xwe vekin. Ti kes nikare inkar bike ku em Kurd xwediyên dîrok û çandeke kevnar in. Ma wê heta kengê welatê me bindest be? Mafê me jî heye em bi ziman û çanda xwe li ser xaka xwe azad bijîn.”
Leyla Gulo bi van gotinan axaftina xwe bi dawî kir: “Em malbatên şehîdan heta dawiyê emê li ser şopa şehîdên xwe bin. Lewra em xwediyên vî welatî ne. Gelê Kurd ne gelekî biyanî ye û nehatiye xaka civakekê dagîr nekiriye. Kurd xwediyên Kurdistanê ne. Dijmin çi dike bila bike, em ti carî serê xwe natewînin, lewra em ji xwe bawer in. Banga me ji bo tevayiya gelê Kurd re ew e ku têkoşîna xwe bi ruhê şehîdan xurt bikin. Herwiha divê gel li hêviya ti kesî nemînin ku mafê wî biparêze. Lewra plan û êrişên ku tên kirin, bi erêkirina hêzên navneteweyî ne. Her yek ji wan ji bo berjewendiyên xwe plana li ser me dide meşandin. Ji bo wê ya herî girîng û pêwîst, xurtkirina berxwedanê ye.”