Dilîn EHMED-Qamişlo
Endama navenda Kevana Zêrîn Civîn Xelîl diyar kir ku, ji ber fikir û felsefeya Rêberê Gelê Kurd Abdullah Ocalan li dijî desthiladariyê ye, dixwazin Rêbertiyê û gel ji hev qut bikin.
Li seranserê cîhanê ji bo rakirina tecrîda li ser Rêberê Gelê Kurd Abdullah Ocalan, çalakî tên lidarxistin. Ji 2019 ve malbat û parêzerên Rêberê Gelê Kurd Abdullah Ocalan, serî li Serdozgeriya Komara tirkî ya Bursayê didin. Lê bersiv nayê dayîn.
`Em li ser fikir û felsefeyeke azad bi rêxistin bûne`
Li ser mijarê endama Navenda Kevana Zêrîn ya bajarê Qamişlo Civîn Xelîl got, ev demeke dirêj e ne malbat ne jî parêzeran bi Rêbertiyê re hevdîtin nekirine. Ev rewş di nava gelê Kurd de fikarên mezin çêdike. Civîn Xelîl axaftina xwe wiha domand: “Armanc ji tecrîda li ser Rêbertiyê diyar e. Ji ber ku fikir û felsefeya Rêber Apo li dijî serdestî û desthilatiyê ye, hêzên navneteweyî ji xwe re xeter dibînin. Ji ber wê rojbiroj tecrîdê girantir dikin. Lê bila baş bizanin ku wê armanca wan pêk neyê, lewra em li ser fikir û felsefeya Rêbertiyê bi rêxistin bûne.”
Civîn Xelîl got, ji bo ku em rêberê xwe Abdullah Ocalan ji zindana faşîstan rizgar bikin, erkê herî mezin dikeve ser milê ciwanan. Lewra Rêbertiyê ev bawerî daye me û dibêje, `me bi ciwanan dest pê kir, emê bi ciwanan bi ser bikevin`. Divê tevayiya gelê Kurd û azadîxwaz bi taybetî ciwan, li seranserê cîhanê çalakiyên ji bo azadiya Rêbertiyê xurttir bikin.
`Xwedîderketina li Rêbertiyê, xwedîderketina li şehîdan e`
Endama Kevana Zêrîn Civîn Xelîl bang li civaka navneteweyî kir ku, li hemberî vê neheqiyê çavê xwe veke. Civîn axaftina xwe wiha bi dawî kir: “Li hemberî planan û ji bo rakirina tecrîda li ser Rêberê Gelê Kurd Abdullah Ocalan, divê gel li ser piyan be. Lewra xwedîderketina li Rêberitiyê, xwedîderketina li xwîna şehîdan ne. Ji bo hêzên navneteweyî ku guh û çavên xwe girtine, banga me ew e ku, vê neheqiyê bibînin û qebûl nekin. Divê bi wijdan erkê xwe pêk bînin. Herwiha ez bang li ciwan jin û mêran yên azadîxwaz dikim ku, Rêbertiyê baş nas bikin û bibin şopdarên xeta felsefeya azad. Êdî dem hatiye ku em welatê xwe ji bindestiyê rizgar bikin û bi Rêberitya xwe re jî azad bijîn.”