Ayşa Silêman/ Dêrik
Şêniyên bajarê Dêrikê bi dirûşma “Zimanê me Kurdî ye, Mafê me Destûrî ye” ji bo parastina zimanê Kurdî û neqebûlkirina biryara 3 waneyan bi zimanê Kurdî di heftiyê de, konê pirotestokirinê vedan.
Şêniyên bajarê Dêrikê bi dirûşmeya “Zimanê me Kurdî ye, Mafê me Destûrî ye” ji bo parastina zimanê Kurdî û neqebûlkirina biryara 3 wane bi zimanê Kurdî li pêşiya dibistana Yûsiv Elezeme konê pirotestokirinê vedan. Di vê insiyatîfê de hemû xwendekar, malbatên şehîdan, endam û rêveberên saziyan amade bûn. Wê ev insiyatîf çend rojan berdewam bike heya ku biryara Wezareta Perwerdeyê ji bo zimanê Kurdî were guhertin.
Insiyatîf bi silogan û dirûşmeyên ziman dest pê kir, paşê li ser navê şêniyên bajarê Dêrikê daxuyanî hat dayîn.
Di destpêka daxuyaniyê bal hat kişandin li ser pêvajoya lihevhatinê ku hikûmeta veguhêz zimanê Kurdî sînordar dike û wiha hat gotin: “Heta niha zimanê Kurdî di heftiyê de 3 demjimêran hatiye naskirin. Ev tişt ne li gorî mafên mirovî yê li tu deverê cîhanê sînordarkirina zimanenekî ya bi vî rengî nehatiye ditîn. Gelê Kurd, ji bo zimanê Kurdî bi salan têkoşîneke bêhempa meşandine û bi Şoreşa Rojava perwerdeya bi zimanê Kurdî, kar û xebat bi zimanê Kurdî hatine pêşxistin.
Di berdewamiya daxuyaniyê de wiha hat nirxandin: “Ev deskeftî bi berdelên giranbuha hatine bidestxistin, divê bê zanîn ku gelê me ji vir û şûn de dev ji wan desteftiyan bernade. Heta ku zimanê me bi awayekî fermî di destûrê de bê misogerkirin û perwerdeya bi zimanê Kurdî bên qebûlkirin em ê tekoşîna xwe berdewam bikin.”
daxuyanî de wiha qediya: “Em wekî hemû gel û saziyên Dêrikê ji bo bi destxistna mafê zimanê Kurdî dest bi rêzeçalakiyan dikin û gava destpêkê konê xwepêşandanê di roja xwe ya yekemîn de dest pê dike. Em bang li hemû gelên xwe li bajarê Dêrikê dikin ku tevlî konê xwepêşandanê bibin û parastina zimanê Kurdî bikin, em zimanê Kurdî bi têkoşîna xwe di destûrê de bidin fermîkirin û mafê xwe yê bingehîn bi dest bixin.”
Di heman demê de Meclisa Malbatên Şehîdan a bajarê Dêrikê jî di bin konê pirotestokirinê daxuyaniyek da.
Di destpêka daxuyaniyê wiha hat gotin: Ev dema me weke qonaxeke dîrokî û çarenûsî ye ku divê îradeya hevpar û naskirina nasnameyan bibin bingeha paşeroja welat, em bi biryarên Wezareta Perwerdeyê ya hikumeta veguhêz re rû bi rû dimînin. Ev biryarên ku dixwazin zimanê Kurdî di nav sînorên çend saetên sembolîk de bifetisînin, mîrat û berdewamiya heman hişmendiya tekperest û asîmîlasyone. Zimanê Kurdî ne tenê amûrekî ragihandinê ye; ew bingeha hebûna me, nasnameya gelê me û reseniya dîroka me ye.
Di berdewamiya dawiya daxuyaniyê de wiha hat ravekirin: “Em biryara kêmkirina waneyên zimanê Kurdî bi tundî red dikin û vê gava paşverû wekî binpêkirineke rasterast ji peymana 29’ê çileya 2026’an û hebûna gelê Kurd dinirxînin. Em daxwaz dikin ku zimanê Kurdî bibe zimanê fermî û zimanê perwerdeyê. Her hewldanek ji bo guherandina navên kurdî yên herêman yan qutkirina têkiliya zarokên me ji zimanê wan ê dayikê, metirsiyeke mezin e li ser aştiya civakî û biratiya gelan e. Em wekî malbatên şehîdan dûbare dikin ku zimanê me hebûna me ye. Em ê li ser şopa şehîdên xwe bin û li dijî her cûre siyaseta înkarê, têkoşîna xwe ya rewa û demokratîk heya bi serkeftinê geş bikin.”
