Navenda Nûçeyan
Şîneyên Qamişlo bi meşeke girseyî biryara wezarata perwerdeyê a hikumeta veguhêz a Sûriyê ku perwerdeya bi zimanê Kurdî tênê bi 3 waneyan di hefteyê de sînordar kiriye, red kirin. Di meşê de hate tekezkirin ku ziman beşek girîng a nasname û çanda civaka Kurd e ku divê bi fermî were pijrandin.
Li hemberî biyara Wezareta Perwerdê ya hikumeta veguhêz a derheqê zimanê Kurdî derket, ku di heftiyê tenê 3 wane bi zimanê Kurdî were dayîn, ev çend roj in çalakiyên cûr be cûr li hemû bajarên Parêzgeha Hesekê û herêma Kobanê tên lidarxistin. Îro jî di heman çarçoveyê de ji aliyê Însiyatîfa Gel a Qamişlo meşeke girseyî bi beşdarbûneke berfireh a gel hat organîzekirin. Xwepêşandan ji çerxerêya Sonî a li bajarê Qamişlo dest pê kir û li çerxerêya Şehîdan veguherî mîtîngê.
Di meşê de pankartên ku li ser wan hatibû nivîsand; “Zimanê me çand û hebûna me ye”, “Me bi Kurdî dest pê kir û em ê bi Kurdî bidomînin”, “Zimanê xwe biparêzin, nasnameya xwe biparêzin”, “Zimanê Kurdî dengê gelê Kurd e û Em bi zimanê xwe hene” hatin bilindkirin.
Di heman demê de, beşdaran dirûşmeyên ku girîngiya zimanê Kurdî û pêwîstiya parastina wê tekez dikirin, di nav wan de: “Bê ziman jiyan nabe, zimanê me hebûna me ye, zimanê min ê Kurdî mafê min ê di destûrê de ye” qîr kirin.
Meş li Qada Şehîdan veguherî mîtîngê û bi sirûda Ey Reqîb kêliyek rêzgirtinê ji bo giyanê şehîdan hat girtin. Piştre endama Koordînasyona Kongra Star Cewahir Osman axivî û tekez kir ku zimanê Kurdî ne tenê amûrek ragihandinê ye, lê belê stûnek bingehîn a hebûna gelê Kurd, nasname, çand û bîra wan a dîrokî temsîl dike.
‘Pabendbûna bi zimanê Kurdî berpirsiyariyeke kolektîf e’
Cewahir destnîşan kir ku veqetandina tenê sê waneyan di hefteyê de ji bo hînkirina zimanê Kurdî pêdiviyên xwendekar û civakê pêk nayne, ji ber ku parastina ziman li dibistanê dest pê dike û kêmkirina demjimêrên hînkirinê rasterast bandorê li ser şiyana nifşên nû dike ji bo fêrbûna zimanê dayikê û girêdayîbûna bi çanda xwe û wiha got: “Pabendbûna bi zimanê Kurdî berpirsiyariyeke kolektîf e dikeve ser milê dê û bavan, xwendekaran, saziyên perwerdehiyê û civakê. Gelê Kurd, tevî şert û mercên ku pê re rû bi rû mane, zimanê xwe parastiye û ji nifşekî gihandiye nifşekî din, parastina zimanê Kurdî parastina nasname û hebûnê ye. Pêwîst e zimanê Kurdî di dibistan, sazî û qada giştî de hebe.”
Endama Koordînasyona Kongra Star Cewahir Osman di dawî de tekez kir ku daxwaza berfirehkirina perwerdeya bi zimanê Kurdî ne ji xwesteka parçekirinê ye, lê ji mafê civakê yê ku parastina ziman û çanda xwe bike, tê. Herwiha banga pabendbûna bi zimanê Kurdî, fêrkirina wê ji nifşên pêşerojê re kir û ew wekî emanet û berpirsiyariyek li hember dîrok û pêşeroja gelê Kurd dît.
