Navenda Nûçeyan
Di vê rewşa xeternak ku herêm tê re derbas dibe û piştî lihevkirinên ku hiştiye rêjeya êrişên Îsraîlê li ser Lubnanê kêm bibe, bi taybet piştî pêkanîna Herêmên Ceribandinê, êdî niha Hizbullah hewl dide ku xwe ji nû ve bi hêz bike û ji xwe re xetên piştgiriya leşkerî û lojistîk ji Sûriyê xêz dike.
Nîqaşa li ser şiyana Hizbullahê ya jinûveavakirina cebilxaneya xwe ne tenê bi tiştên ku di herêmên ceribandinê de diqewimin ve sînordar e. Qaçaxçîtiya çekan a berdewam li seranserê sînorê Lubnan-Sûriyê û şiyana artêşa Lubnanî ya ji bo astengkirina van rêyan bi bandor tê dîtin.
Li gorî raporeke lêkolînerê Navenda Alma ya Îsraîlê Dvir Perry, artêşa Lubnanî di 26’ê Tebaxê de girtina welatiyekî Sûrî li bajarokê Eyha, li navçeya Raşaya nêzîkî sînorê Lubnan-Sûriyê, dema ku ew hewl dida çend guleyên RPG bi qaçaxî derbasî Lubnanê bike, ragihand.
Raporê destnîşan kir ku ev bûyer hejmareke sînorkirî ya desteserkirinên cuda yên ku ji hêla artêşa Lubnanî ve li ser sînor hatine ragihandin, zêde dike. Lê valahiyek heye ji ber ku desteserkirinên ku artêş nîşan dide pir caran piçûk û sînordar in û bi piranî ji mîqdarên hindik ên çekên kevin pêk tên. Berevajî vê, raporê rewşeke cûda li aliyê Sûriyê destnîşan dike, di mehên dawî de, dezgehên ewlehiyê yên Sûriyê belgeyên hejmareke mezin ên çekan eşkere kirine û tê gotin wan di rêya Lubnanê de desteser kirine. Di nav van barhilgiran de mûşek, mûşekên kornêt yên dijî-tankan, çekên RPG û cebilxaneyên din hebûn. Hêjayî gotinê ye ku di Tîrmeha 2026’an de rayedarên Sûriyê desteserkirina barhilgireke dronan jî ragihandin. Herwiha di 3’yê Tebaxê de Artêşa Lubnanê da eşkerkirin ku mûşekên Grad ên 122 mm li herêma Arsalê desteser kirine û tekez kir ku ji Sûriyê bi qaçaxî derbasî Lubnanê bûne.
