Kongreya Star ji bo piştgiriya hêzên parastinê meşiya

28

Bi armanca piştgiriya hêzên parastinê endamên Kongreya Star li Herêma Firatê bi durişma “Na ji qirkirin û dagîrkeriyê re emê jin û jiyanê biparêzin” meşeke girseyî li dar xistin.

Li Kobanê di çarçoveya hemleya Kongreya Star ya li dijî êriş û dagîrkeriya li bakur û rojhilatê Sûriyê de, herwiha êrişa ser jinan ku 8’ê Cotmehê dest pê kirbû, ji bo piştgiriya hêzên parastinê û bi durişma “Na ji qirkirin û dagîrkeriyê re emê jin û jiyanê biparêzin” meşeke girseyî hat lidarxistin. Meş bi beşdariya bi sedan ji şêniyên Herêma Firatê, saziyên civaka sîvîl, Rêveberiya Xweseriya Demokratîk, Meclisa Malbatên Şehîdan û Partiyên Siyasî hat lidarxistin. Meş ji Qada Jina Azad dest pê kir û li qada Şehîd Egîd rawestiya.

Piştî rêzgirtinê berdevka Kongreya Star ya Herêma Firatê Mizgîn Xelîl axivî.

Mizgînê berxwedana parezvanên rûmetê silav kir û wiha got: “Hêzên parastina rûmetê di şoreşa Rojavayê Kurdistanê de li dijî tevahî êrîşên çeteyên DAIŞ’ê û dewleta tirk şer kirin û gelê xwe parastin. Şervanên me ji Kobanê ber bi Minbic, Reqa û herî dawî Dêrezorê soza serkeftinê dan û bi cih anîn. Loma ew bûn sembol û pêşengên jinên vê şoreşê. Em jî weke Kongreya Star berxwedan û têkoşîna wan silav dikin û dibêjin çawa ku hûn li dijî DAIŞ’ê bi serketin, em ê li dijî hişmendiya serdest  û dagirkeriyê têkoşîn bikin û bi ser kevin.”

Çalakî bi durişma”Jiyan jiyan azadî” bi dawî bû.